Жұмыла көтерген жүк жеңіл
Құрметті жерлестер!Жанқожа Нұрмұхаммедұлы өз дәуірі артқан ұлы жүкті қайыспай көтеріп, ел, халық алдындағы парызын адал атқарып өткен перзенттер санатында. Озбыр да өктем жауға қарсы азаттық туын көтеріп, өмірінің ақырғы күндеріне дейін аттан түспеген батырдың аңсаған арманына бүгінгі ұрпақ біз жеттік.
Батырдың тағылымды өнегесін өскелең ұрпаққа насихаттау – біздің парызымыз. Сол мақсатта биыл Қазалы ауданында Жанқожа бабамыздың дүниеге келгеніне 250 жыл толу мерейтойын республика көлемінде атап өту белгіленді. Дайындық жан-жақты жүргізілді. Айтулы шараның ұйымдастыру жұмыстарына ауданның әрбір тұрғыны білек түре қатысты деуге толық негіз бар.
Өңіріміздегі киелі орындардың бірі саналатын Жанқожа баба кесенесінің салынғанына да 30 жылдан астам уақыт өтті. Қазалылықтар үшін киелі осынау кесене Тәуелсіздіктің алғашқы жылдары, қиын-қыстау кезеңде салынған болатын. Соған қарамастан халық жұдырықтай жұмылып, кесенені аз ғана уақыттың ішінде өте сапалы етіп аяқтаған еді.
Биыл міне, араға жылдар салып, баба кесенесінің алдына батырдың еңселі ескерткіші орнатылмақ. Елінің бостандығы үшін аянбай күрескен батыр баба ескерткішінің туған жерде ашылуы – баршамыз үшін көптен күткен қуаныш.
«Ұранды елдің ұрпағы қайсар келеді» дегендей, өскелең ұрпақ өткенін танып, болашағын бағамдау үшін мұндай шаралар әрқашанда қажет. Алдағы уақытта да жалғасын табатындығына күмән жоқ.
Баршаңызды батыр бабамыздың әруағы желеп-жебеп жүрсін! Жанқожадай бабамызға арман болған азаттығымыз баянды, мемлекетіміз мәңгі болсын!
Самұрат ИМАНДОСОВ,
Қызылорда облысының құрметті азаматы, “Парасат” орденінің иегері
