Қайырымдылық – адам баласының бойынан табылуы тиіс асыл қасиеттердің тек біреуі ғана. Жүрегі мейірімге толы жан жеңілі мен ауыры қатар жүретін қатігез өмірдің басты тірегі. Мейірімге толы қайырымды жүрек мұқтаж жандарға демеу болумен оларға өмір сүруге жаңа күш пен талпыныс сыйлай алады. Көмекке зәру жандарға қиналған шағында қол ұшын созу – әрбір адамның парызы.

Мойнындағы осынау парызды орындау мақсатында Қазалы қаласының оңтүстік жастарының ұйымдастыруымен жақында кіші футболдан қайырымдылық турнирі ұйымдастырылды. Шаршы алаңдағы бәйгеге 8 команда сайысқа түсіп, үздіктер анықталды. Сайыс­ты Қазалы қаласының әкімі Қайрақбай Орынбасаров ашып, қатысушыларға сәттілік тіледі.

Турнирге 8 команда ішінен ширек финалға тек 4 команда жолдама алды. Өзара бақ сынаған 4 команданың ішінен «Тұран» командасы өзгелерден оза шауып, І орынды қанжығасына байлады. Ал ІІ орынды «Спарта» командасы иеленсе, «Достық» командасының жігіттері ІІІ орынды місе тұтты.

Турнир соңында жеңім­паздарға алғыс хат беріліп, арнайы ауыспалы кубокпен, медальдармен марапатталды. Бір қызығы, ұтқан жүлдені ақшалай алғанша, қайырымдылыққа жұм­­сай­мыз деп шешкен жігіттер қайырымдылыққа өз үлестерін қосты. Олар әлеуметтік осал топтағы 8 баланың мектепке оқу құралдарын алып, ойын соңында балаларға табыстады. Турнирге арнайы шақырылған ата-аналар да ұйымдастырушыларға ризашылығын білдіріп, алғысын айтты.

Көрдіңіз бе? Жігіттер жасаған ізгілікті іс бірнеше отбасына қуаныш сыйлады. Қайырымдылық жасауға үлкен дүниенің керегі жоқ, тек мейірімге толы жүрегіңіз болса болғаны.