Бастауыш партия ұйымдарының есебі тыңдалды
Партияның аудандық филиалының 27 бастауыш партия ұйымы бар. Бүгінге дейін партия алаңында 15 бастауыш ұйымының төрағаларымен жиналыс өтті. Басты мақсат атқарылған жұмысты талқылап, алдағы кезеңге міндеттер белгілеу.Осы мақсатта қалған 12 бастауыш партия ұйымының төрағаларымен де кезекті есеп беру жиыны өтті. Іс-шараға арнайы партия филиалының төрағасы Ғазиз Әліш және әр округ бойынша аудандық мәслихат депутаттары қатысты.
- Бүгінде партиялық жобалар шеңберінде ауқымды іс-шаралар жүзеге асырылып келді. «Бақытты отбасы» жобасының «Баланы мектепке даярлайық!» акциясы дәстүрлі түрде өткізіліп, бірқатар оқушыларға мектеп формасы және оқу құралдары табысталды. «Кедергісіз келешек» және «Ұлттық мұра» жобалары бойынша іс-шаралар тұрақты түрде ұйымдастырылуда. Партия филиалымен бірлесе халық қалаулыларының қатысуымен қоғамдық қабылдаулар өтуде, - дейді «Қ.Сәтбаев» БПҰ төрайымы Зинегүл Жүсіпова.
Сонымен қатар, бастауыш партия ұйымының басқа да төрағалары атқарған жұмыстары мен алдағы жоспарларын баяндады. Сайлаушылармен тығыз қарым-қатынас орнатып, «AMANAT» партиясының бағдарламалары мен жобалары бойынша бекітілген кестеге сәйкес іс-шаралар жүргізіліп жатқандығын жеткізді.
Жиын соңында Ғазиз Әлмәмбетұлы партияның іргетасы, басты күші бастауыш партия ұйымдары екенін атап өтіп, жұмысты әрі қарай жандандыру бойынша ұсыныстарын жеткізді.
#AMANAT
