Рәміздерге құрмет - мемлекеттік құрмет
Бүгін Қазалыда Мемлекеттік рәміздердің 30 жылдығына орай салтанатты шара өтті.
Әйтеке би кентіндегі Рәміздер алаңында ұйымдастырылған шарада аудан әкімі Мұхтар Оразбаев тұрғындарды айтулы мерекемен құттықтады.
– Мемлекеттік рәміздер – Ту, Елтаңба және Әнұран Қазақстан Республикасының дербестігі мен тәуелсіздігін бүкіл әлемге танытушы әрі мемлекетіміздің өткені мен бүгіні және болашағы арасындағы сабақтастықтың жарқын көрінісі. Сондай-ақ рәміздер – халқымыздың мұқалмас рухын, қаһармандығы мен даналығын, асқақ арман-тілегін жеткізетін құнды белгілер. Жас ұрпақтың намысын оятып, патриоттық сезімдерін ұялататын – рәміздер мерекесі құтты болсын, көк байрағымыз биіктен көріне берсін, – деген ізгі тілегін білдірді.
Шара барысында бір топ азаматтар ауданымыздың қоғамдық-саяси және әлеуметтік-экономикалық өміріне белсене қатысып, зор үлес қосқаны үшін аудан әкімінің Алғыс хатымен марапатталды.
Мерекеге орай ауданымыздың мәдениет майталмандары концерттік бағдарлама ұсынып, өнер көрсетті. Әсіресе, домбырашылардың Мемлекеттік рәміздердің 30 жылдығына орай ұйымдастырған көрінісі өте әсерлі шықты.
#Қазалы
