Жарысқа 16 команда қатысты. Нәтижесінде үшінші орынды «Қайсар 79» командасы қанжығасына байлады. Ал №249 мектеп-лицейдің жігіттері екінші орынды қанағат тұтты. Төрт топқа бөлініп өзара тартысқан командалардың ішінен «Намыстың» намысшыл аяқ допшылары бірінші орынды иеленді.

Сайыс барысында ерекше көзге түскен ойыншылардың еңбегі елеусіз қалмады. «Үздік қақпашы» бағамы Нұрперзент Төребекке бұйырды. Ал Серікболсын Ерғалиев «Үздік ойыншы» деп танылып, «Үздік шабуылшы» бағамын Мұқағали Сансызбаев иемденді. Одан бөлек «Үздік қорғаушы» номинациясына Ернар Ибрай лайық деп танылды.

Айта кету керек ақынның інісі Әміржан ­Орымбаев жарыстың жоғары деңгейде өтуіне атсалысты. Ал еске алу турнирін ұйымдастыруда басы-қасында болған досы Нұрлан Төрехан барша азаматтарға алғысын білдірді.

– Абдулла Сапар ауданға ғана емес, облысқа, республикаға белгілі ақын болды. Айналасындағыларға шуағын шашып, үлкенге – құрмет, кішіге – ізет таныта білетін арда азамат еді. Көмекке зәру жандарға қолынан келгенін аямай, артынан ерген оқушыларына дұрыс жол көрсетті. Осындай атпал азаматты ұмыт қалдырсақ, біздің азаматтығымызға үлкен сын. Бұл елдегі пандемияға байланысты көптен ұйымдастырылып отырған шара. Сондай-ақ турнирдің мақсаты – жастарды спортқа баулу, алдағы болатын ойындарға дайындау. Турнирді ұйымдастыруға атсалысқан Абдулланың достары мен аға-інілеріне алғысым шексіз, – деді ол.