Үстел теннисі – белгілі ғи­марат ішінде, арнайы ойын үстелінде ракеткамен ойналатын, шапшаңдыққа бағытталған спорт түрі. Егер қарсылас арнайы допты үстелден тыс жер­ге асырса немесе сіздің ала­ңыңызға түсіре алмай допты ракеткамен торға ұрса сіз арнайы ережелер бойынша ұпай ала аласыз. Айта кетерлігі, үстел теннисін ойнау қол-көз координациясын жақсартып, ақыл-ойды сергітеді, концентрация мен тактикалық стратегияны дамытады екен. Сон­дай-ақ, ойлау шапшаңдығы мен рефлекстерді дамытады. Буындарға да аса пайдалы. Мидың саулығын сақтайды.

Осындай адам денсау­лығына орасан зор пайда келтіретін спорт түрін жанына серік еткендердің қатарында Басықара ауылындағы №182 мектептің 7 сынып оқушы­сы Айдос Дөңесұлы да бар. Болашағынан зор үміт күтті­ретін Айдос дарынды спортшы. Оның үстел теннисіне алғаш болып баулыған анасы Мирамкүл Бақдаулетқызы. Ол ұлына 1 сыныптан бастап теннис ойынының қыр-сырын үйретіп, ептілікке, шапшаңдыққа шың­да­ды. Қазір Айдос үстел теннисінен аудандық, облыс­тық жарыстардың бірне­ше рет жеңімпазы атанды. Айдос­тың анасы Мирамкүл бала­сының бойыннан спортқа де­ген қызығушылықты байқа­ған сәттен-ақ, бірден үстел теннисін үйретуді жөн көргенін айтады. «Айдос алғыр ба­ла. Алға қойған мақсатқа же­ту үшін барын салады. Әр жарысқа барарда өзіне артыл­ған жауапкершілік жүгін жақ­сы сезінеді. Бүгінге дейін бір­неше рет жүлдегер атанды. Бірақ, ізденуден, үйренуден, жаттығудан жалыққан емес. Ұлымның сабағы мен спортта да қатарластарына үлгі көрсетіп жүргені мен үшін қуаныш», – дейді анасы.

Басықара ауылындағы №182 мек­тептің дене шынық­тыру пәнінің мұғалімі Мұхтар Сәлмен­нен Айдос туралы сұра­ғанымызда: «Үстел теннисі жыл­дамдық пен қырағылықты қажет ететін спорт түрі. Еппен қозғалып, қарсыласын қапы қалдырудың сырын Айдос жақсы біледі. Ол жақында өткен аудандық жарыста бар­лық бәсекелесін ұтып, ақтық сайыста №226 мектеп-гим­назияның бірінші ракеткасы 11 сынып оқушысы Нұрислам есімді мықты спортшыны 2/0 есебімен ұтып, ауданның №1 ракеткасы атанды. Оның есімі қазірден аудан, облыс көлеміне танымал. Жалпы біздің мектепте үстел теннисін жетік меңгерген оқушыларымыз көп. Ауыл жастары да салауатты өмір салтын ұстану жолында спорттың түр-түрімен айналысады», – деді.