Жақсылықты жалау еткен жарыс
Көпшіліктің ойынына айналған футболда қайырымдылық қорына ақша түсіру үшін өткізілетін матч көп кездеседі. Жанкүйер жұрт мұндайды теледидардан көріп жүрген болар. Басты мақсаты – әдемі ойын өрнегін көрсетіп, билеттен түскен ақшаны қандай да бір сырқаты бар жандардың есебіне аудару.Өткен сенбіде Қазалы аудандық дене шынықтыру спорт бөлімі және аудандағы қайырымдылықпен айналысып жүрген жандардың ұйымдастыруымен спорт кешенінде кіші футболдан турнир өтті. Аталған жарысқа 15 команда қатысып, көрерменге жақсы ойын ұсына білді. Нәтижесінде жүлделі бірінші орынды «Сыр маржаны» командасы иемденді. Финалда сырмаржандықтарға есе жіберген «Барсакелмес 11 - 93 жігіттер» командасы екінші орынға тұрақтады. Үшінші орынды «Науат» командасы жеңіп алды. Сонымен қатар осы турнирде “Үздік ойыншы” бағамымен Демекбай Нұрғазы және “Үздік қақпашы” бағамымен Мұстафа Есмамбетов марапатталды. Жеңімпаз болған командалар және үздік ойыншыларға арнайы диплом және кубок сыйлықтары табысталды.
Турнирдің жалпы мақсаты аудандағы екі жасөспірімнің еміне көмектесу болды. Жұмыла жақсылыққа ұмтылған жастардың бұл ісі үлгі етуге тұрарлық дүние. Келешекте көмекке мұқтаж жандарға қол ұшын созатын шара көптеп ұйымдастырылса дейміз.
Серік АҚМЫРЗА
