«Арайдың даусын естіген бойда үйге кіріп бардым. Қою түтін аралас өрт ішінде бір бұрышта көршімнің 6 жа­сар қызы мен 3 жасар ұлы қат­­ты қорқып жүре алмай отыр екен. Жарақат алған қо­лы­­ма қарамастан дереу бі­реуін көтеріп, екіншісін же­тек­­теп қауіпсіз аймаққа алып шық­тым. Су беріп, құтқа­ру шарал­арын жасадым. Қай­ғы­лы жағ­дайдың алдын алуы­ма мектеп қабырғасында өрт қауіпсіздігі туралы оқып-­үйренгендігімнің пайдасы тиді», дейді Бақытжан Құдай­құлұлы.

Батыр бала анасына 101 же­лісіне хабарласуын ескерткен. Алайда, өрт сөндіру қыз­мет­­керлері жеткенше үйді лау­ла­ған өрт құшағына алып үлгерген. 16 ақпанда Абай ауда­ны­ның Құрсай шағын ауда­нын­дағы үйлердің бірінде өрт шыққаны туралы хабарлама сағат 16.39-да келіп түс­ті. Өрт сөндіру қыз­ме­тінің 14 адам­нан құрал­ған тобы Жаңа­құрылыс көшесіндегі уақыт­ша салынған үйдегі (времянка) 60 шаршы метрді шар­­пыған өртті 2 сағатта сөн­дірді.

Төтенше жағдай қызметі таратқан ақпарат бойынша өрт салдарынан адам шығыны орын алған жоқ. Бұған басты себепкер – құтқарушы бала», дейді мамандар.

Осылайша айдың-күннің аманында көрші баланың ер­жү­рек­тігінің арқасында екі бүл­­діршін ата-анасымен қай­та қауышты. «Балалардың қат­ты қорыққаны болмаса, жағ­дайлары жақсы. Өрт болған кезде үйде ата-анасы болған жоқ. Мамандар өрт­тің себебін анық­тауда», дейді Тө­тенше жағ­дайлар департамен­тінің өкілі Мадияр Елеусізұлы. 

Бақытжанның сынып же­­текшісі Бақытгүл Лекеро­ваның айтуынша, батыр бала төрт ағайын­ды баланың кен­жесі екен. Сы­ныпта тек белсен­ділігі­мен көзге түсіп жүретіндігін жеткізді.

«Оқушымыздың бұл әре­кеті өз қатарластарына үл­кен өнеге болары анық. Се­бе­бі, жанып тұр­ған отқа жас бала түгіл үл­кен­­­дердің өзде­рі тіксінбей кіруі мүм­кін емес. Сыныпта айнала­­­сына мейі­рім шуағын шашып жүре­тін Бақытжанның тәрбие са­ғаттарына қатысуы да бел­сен­ді. Білім ұясы осындай батыр перзенттермен мақтана алады», дейді сынып жетекшісі.

Қалалық ТЖД басшысы Нұр­болат Дербісов батыр ұл­ды ар­найы Алғыс xатпен марапаттады, сондай-ақ «Ерлігі үшін» медалімен марапаттау үшін елі­міз­дің ІІМ атына және арнайы алғыс xатпен марапаттау үшін қалалық әкімдікке ұсыныс жолдады.

Департамент басшысы ер­жүрек баланың бұл әрекеті біз­ге үлкен көмек болды дей­ді. «Бо­­лашақта дайын құтқа­ру­шы бо­луға сұранып тұр. Са­­лалық жо­ғары оқу орын­дар­­ына түсуіне кеңес береміз әрі қол­­даймыз», дейді Н.Дер­бісов.

Өрттің неден туындағаны да кейіннен анықталды. Негі­зінде үйдегі алты жасар қыз бен үш жасар ұл оттықпен ой­нап отырып, артынша өртке ұласқан. Өздері өшірмек болған өрт ұлғая түскен.

Төтенше жағдайлар депар­та­­ментінің қызметкерлері Кұр­сай шағын ауданында бір­неше рет рейдтік іс-шаралар өткізген. Шаһардың шағын аудандарында өрт апаттарының жиі орын алатынының себебі, көптеген үйді жылыту үшін қатты отын пайдаланылады.