Анасын өлтірген қызылордалық ұзақ жылға сотталды
Қызылорда облысының қылмыстық істер жөніндегі мамандандырылған ауданаралық соты өзінің анасын балғамен ұрып өлтірген 26 жастағы жігітке үкім шығарды, деп хабарлайды ҚазАқпарат тілшісі. Оған Қазақстан Республикасы Қылмыстық кодексінің 99-бабының 2-бөлігінің 8-тармағымен айып тағылған еді.Оқиға барысы былайша өрбіген. Айыпталушы сол күні жиен інісімен, одан кейін көршісімен арақ ішкен. Олардың екеуі де үйлеріне кетіп қалған. Бұл кезде жігіттің екінші топтағы мүгедек анасы ұйықтап жатқан еді. Сотталушы анасының басы, кеуде тұсынан бірнеше мәрте балғамен ұрып, аяғымен тепкілеген. Ауыр жарақат алған әйел сол жерде көз жұмған. Қызылорда облысының қылмыстық істер жөніндегі мамандандырылған ауданаралық сотының үкімімен сотталушы А. ҚР ҚК-нің 99-бабының 2-бөлігі 3-тармағымен кінәлі деп танылып, 17 жылға бас бостандығынан айырылды. Ол жазасын қылмыстық-атқару жүйесінің қауіпсіздігі барынша жоғары мекемесінде өтейді.
