Кеше өткен форумға өңірлік қаржы ұйым­дарының және мемле­кеттік органдардың басшылары мен кәсіпкер әйелдер қатысты. Іс-шара аясында іскер әйелдер өз өнімдерінің көрмесін ұйым­дастырды.

Форум аймақта екінші рет өткізіліп отыр.

Облыс әкімі Қырымбек Көшербаев бүгінгі таңда республика бойынша кәсіпкер әйелдердің үлесі 50% - тен аса­тынын, сонымен қатар ша­ғын және орта бизнес кәсіп­орын­дарының 60% - тен астамын әйелдер басқаратынын атап өтті.

– Бұған, әрине, мемлекеттің кә­­сіп­­­керлікті дамытудағы жан-жақ­­­ты қолдаулары, яғни мем­ле­­кет­­тік, үкіметтік және өңірлік бағдар­ла­малардың, сон­­дай-ақ қаржы инс­титуттары мен «Даму» қорының түрлі бағдарламалары өз сеп­тігін тигізуде. Оның ішінде, 5 млрд теңге мемлекеттік бағ­дарламалар аясында қар­жылай емес қолдауға, қайтарымсыз гранттар беруге және шағын несиелермен қамтамасыз етуге бағытталуда. Айта кету қажет, біз жыл басынан бері «Еңбек» мемлекеттік бағдарламасының қаражатын күтпей-ақ, «Қызыл­орда» Өңірлік инвестициялық орталығы арқылы микрокредиттер беру үшін облыстық бюджеттен 500 млн теңге бөлдік. Қазірдің өзінде орта­лық­пен жалпы құны 522 млн теңгені құрайтын 106 жоба қаржыландыру үшін мақұл­данды. Оның ішінде, әйелдердің үлесіне жалпы құны 112 млн теңгені құрайтын 26 жоба тиесілі,- деді аймақ басшысы.

Облыс әкімі биылғы жылы ауыл жас­тары мен көп балалы аналардың бизнес-жобаларына басымдық беріл­генін атап өтті.

«Жобаларды қаржыландыру бо­йынша қолдау ғана емес, әкімшілік кедергілерді азайту бойынша жұмыстар да жал­ға­суда. Нәтижесінде кәсіп­керлікте жұмыспен қамтыл­ғандардың үлесі 22-ден 26% - ке дейін артты. Ал шағын және орта бизнес саласында 93 мың­нан астам облыс тұрғыны жұмыс істейді», – деді өңір басшысы.

Форумда кәсіпкер әйелдер өз жетістіктерімен бөлісті. Мәселен, өңірде сұлулық индустриясын да­мытуға үлес қосып жүрген Динара Алмусаева төрт жылдан бері осы кәсіппен айналысады. Осы уақыт ішінде ізденуден, еңбек етуден талмаған ол аймақта сұлулық салонының екі филиалын ашып, 25 адамды жұмыспен қамтып отыр. Мұнан бөлек, 600 шәкірт тәрбиелеген.

Ал, «Мансап» жеке мектебін ашқан Наталья Мишукованың тәлім ұясы бастауыш сыныптарға және мектепке дейінгі білім беруге арналған. «Кәсіпкер болу оңай емес. Әсіресе, ұрпақ тәрбиелеу ісі болғандықтан үлкен жауапкершілік екенін сезінемін» дейді ол.

Қызмет көрсету саласында әсіресе тағам дайындаудың жауапкершілігі зор. Бұл тазалық пен мінсіздікті, шеберлікті қажет етеді. Үш жыл бұрын өзінің шағын кулинариясын ашқан Айгүл Борамбаева өңірдегі «Рес­тораторлар мен кондитерлер қауымдастығының» төрайымы. Қонақжай халықтың дастарханын қалай дайындау қажеттігін жетік меңгерген. Ол, сондай-ақ, маман дайындауда шеберлік сағаттарын жиі ұйымдастырып келеді.

Форумда кәсіпкерлікті дамы­туға қатысты ұсыныс-пікірлер тыңдалып, бірқатар белсенді кәсіпкер әйелдерге облыс әкімінің алғыс хаты табысталды.

Атап өту қажет, 2017 жылы аймақ басшысының бастамасы­мен «бір өтінім» қағидаты бо­йынша 70-тен астам қызмет тү­рін көрсететін «Кәсіпкерлерге қыз­мет көрсету орталығы» құрылды.

2018-2020 жылдар аймақта жаппай кәсіпкерлікті дамытудың үш жылдығы ретінде жарияланды. Бұл бірден үш маңызды мәселені шешуге мүмкіндік береді: салық базасын ұлғайту, жаңа жұмыс орындарын құру және өңірдегі қоғамдық-саяси жағдайды жақсарту.

2018 жылдың қорытындысы бойынша Қызылорда облысы бизнесті жүргізу үшін қолайлы жағдай жасаған үздік облыс деп танылып, Тұңғыш Президент-Елбасы Н.Ә.Назарбаев облыс әкіміне «Алтын сапа» сыйлығын табыстаған болатын.