Жәрмеңкеде жұмыс бар
Өткен аптада Қазалы ауданында көрсетілетін мемлекеттік қызметтер және бос жұмыс орындары жәрмеңкесі өтті.Әйтеке би кенттік клубындағы шараны Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің Қызылорда облысы бойынша департаменті басшысының орынбасары Берікбол Байходжаев, аудан әкімі аппаратының басшысы Нұрғиса Жалғасбаев сөз сөйлеп ашып, мән-маңызына тоқталды.
Жәрмеңке барысында халыққа көрсетілетін мемлекеттік қызметтерді алу тәртібі түсіндіріліп, ақпараттық-әдістемелік көмек көрсетілді. Сонымен қатар, 60-ға жуық бос жұмыс орындары жұртшылыққа ұсынылды. Олардың қатарында “Сыр маржаны” ЖШС, “РЗА” АҚ , “Даму”, тағы басқа да жұмыс берушілер бар.
Аудандағы дербес бөлім өкілдері, Жұмыспен қамту орталығының мамандары халыққа өздерінің кеңестерін ұсынды. Сондай-ақ, жәрмеңкеге келген көпшілікке «Азаматтарға арналған үкімет» мемлекеттік корпорациясының «Электронды үкімет» порталы арқылы көрсетілетін мемлекеттік қызметтерді алу тәртібі мен олардың тиімділігі туралы кеңінен түсіндірілді.
Жеңісбек АЙТУҒАН
