Бұл туралы Өңірлік коммуникациялар қызметінде өткен баспасөз конференциясында ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Қызылорда облысы бойынша департаменті басшысының орынбасары, Әдеп жөніндегі кеңес хатшылығының меңгерушісі Берікбол Байхожаев мәлімдеді.

"2014 жылы Елбасының Жарлығымен 2015-2025 жылдарға арналған сыбайлас жемқорлыққа қарсы Стратегиясы қабылданған болатын. Осы Стратегияны жүзеге асыру мақсатында қоғамда сыбайлас жемқорлыққа қарсы мәдениетті қалыптастырудың 2017 жылға арналған кешенді жоспары бекітілді. Жоспарға сәйкес парақорлықтың алдын алуға бағытталған 13 жоба іске асуда. Олар "Оқулық", "Тәрбие", "Ғылым", "Байқау", "Мақала", "Таспа", "Үгіт", "Театр өнері", "Музыка", "Әдебиет", "Мұражай", "Азаматтық бақылау" және "Ашық келісім" жобасы. Бүгінде қоғамда сыбайлас жемқорлыққа төзбеушілікті қалыптастыру мақсатында түрлі нысаналы топтармен мыңнан астам кездесулер өткізілді. Нәтижесінде, сыбайлас жемқорлық сипатындағы қылмыс өткен жылдармен салыстырғанда біршама азайған," - деді Әдеп жөніндегі кеңес хатшылығының меңгерушісі Берікбол Байхожаев.