Мәжіліс жаңа заң жобаларын жұмысқа қабылдады
Палата комитеттері тиісті құжаттарды жұмысқа алды.Мәжілісмен Бауыржан Смағұловтың сөзінше, орман шаруашылығы және ерекше қорғалатын табиғи аумақтар саласындағы заңнаманы одан әрі жетілдіру және құқықтық реттеудегі олқылықтарды жою мақсатында әзірленді.
"Заң жобасы су шаруашылығы құрылыстарын және селден, көшкіннен, қар көшкінінен қорғау құрылыстарын салу үшін ерекше қорғалатын табиғи аумақтардың жерлерін ауыстыру мәселесін регламенттеуге, ерекше қорғалатын табиғи аймақтарды құру кезінде олардың құрамына қателесіп енгізілген, барлық инфрақұрылымымен қоса алғандағы орман кенттерінің мәселелерін шешуге және Алакөл мемлекеттік табиғи қорығының арнайы бөлінген учаскелерінде тұратын жергілікті халықтың мұқтажы үшін шөп шабу мәселелерін шешуге бағытталған", - деді депутат.
Екінші заң жобасы 2002 жылғы 7 қазандағы Ұжымдық қауіпсіздік шарты ұйымының жарғысына өзгерістер енгізу туралы төртінші хаттаманы ратификациялауға бағытталған.
Құжатты таныстырған депутат Айгүл Құспанның айтуынша, көрсетілген хаттама Ұжымдық қауіпсіздік шарты ұйымының Жарғысын ұйымға мүше мемлекеттердің биологиялық қауіпсіздік саласындағы өзара іс-қимылына, сондай-ақ Ұйым Бас хатшысының өкілеттігін мерзімінен бұрын тоқтату мүмкіндігіне қатысты түзетулермен толықтырады.
