Қазақстанда кедейлік деңгейі төрт есе азайды: Дүниежүзілік банк есебі
Сарапшылар көрсеткіштің жақсаруына басты себеп ретінде еңбек табысының өсуін атап отыр
Фото: © istockphoto.com
Дүниежүзілік банктің «Poverty & Equity Brief» қазан айындағы баяндамасында Қазақстандағы әлеуметтік-экономикалық көрсеткіштердің оң динамикасы атап өтілді, деп хабарлайды Azattyq Rýhy.
Есепке сәйкес, Қазақстанда ұлттық кедейлік шегінен төмен өмір сүретін халықтың үлесі 2006 жылғы 18,2%-дан 2025 жылы 4,9% дейін – небәрі төрт есе қысқарған. Сарапшылар бұл көрсеткіштің жақсаруына басты себеп ретінде еңбек табысының өсуін атап отыр.
Халықаралық критерийлер бойынша (паритет бойынша күніне 8,30 доллардан аз табыс табатындар) кедейлік деңгейі 2006 жылғы 55,7%-дан 2024 жылы 13,8% дейін төмендеді. Сонымен қатар, табыс теңсіздігін сипаттайтын Индекс Джини 30,2-ден 29 пунктке дейін төмендеп, Қазақстан бұл көрсеткіш бойынша теңсіздігі ең төмен елдер қатарына енді.
Халықтың әл-ауқатын арттыру мақсатында мемлекет тарапынан бірқатар ауқымды шараны жүзеге асыру жоспарланып отыр. Президент Қасым-Жомарт Тоқаевтың тапсырмасына сәйкес, 2027 жылғы 1 қаңтардан бастап ең төменгі жалақыны 85 мың теңгеден 110 мың теңгеге дейін, яғни 29,4 пайызға көтеру көзделген. Бұл өзгеріс шамамен 1,8 млн адамды қамтиды.
Сонымен қатар, «Халықтық құрылыс» бағдарламасы аясында 2029 жылдың соңына дейін инфрақұрылымды дамытуға Ұлттық қоғамдық қордан 6,5 трлн теңге бағытталып, шамамен 100 мың жаңа жұмыс орнын ашу жоспарланып отыр.
Болжам бойынша, 2035 жылға қарай экономикаға 2,9 млн жұмысшы қажет болады. Оның ішінде 1,8 млн адамға жұмысшы мамандықтары бойынша сұраныс туындайды.
Еңбек және халықты әлеуметтік қорғау министрлігі сұранысқа ие мамандықтар тізімін 51-ден 174-ке дейін кеңейтуді көздеп отыр. Жаңартылған тізімге инженерлік, құрылыс, өнеркәсіп, биотехнология және жасыл энергетика салаларындағы мамандықтар енгізіледі.
Бұдан бөлек, әлеуметтік қолдау жүйесін жетілдіру үшін отбасылардың нақты материалдық жағдайын ескеретін атаулы көмек көрсетудің жаңа критерийлері пилоттық режимде сынақтан өткізіледі.
