Тазалықтың адам өміріндегі маңыздылығына тоқталған Мұхтар Әуесұлы аудан тұрғындары мен мекеме-кәсіпорын ұжымдарын елдік іске белсене араласып, көркейту-көгалдандыру шараларына біркісідей атсалысуға шақырды. Сондай-ақ «Батыс Еуропа – Батыс Қытай» тас жолының, теміржол өткелдері мен шет аймақтардың санитарлық тазалығын тұрақты негізде қамтамасыз етуді тапсырды.

– Қазіргі таңда ауданда санитарлық тазалық жұмыстары қарқынды жүргізілуде. Жерлестеріміз ортақ шаңырағымызды таза ұстау, оның көркеюіне атсалысу – баршамызға парыз екенін үнемі қаперде ұстауы қажет. Таза көше, таза аула – әрбір аудан тұрғынының мақтанышы болуы тиіс. Сол үшін аудан тұрғындарын бірлесе отырып, тазалық шараларына қолдау білдіруге шақырамыз, – деді аудан басшысы.

Сенбілік күнделікті көріп жүргеніміздей, көп кідірісті қажет етпейтін, өмірдегі өзекті мәселе. Себебі, тазалық – өмір айнасы, иманның жартысы. Ол болмаған жерде бейберекетсіздік еңдеп, қоғамда қауіпті жағдайлар орын алып, адам денсаулығына зиянды факторлар пайда болуы ғажап емес.

Бұлай деуімізге өзге елдердегі түрлі жұқпалы ауру-сырқаулар негіз болуда. Яғни, тазалық сақталмаған жағдайда инфекциялық түрлі дерт тарайтынын ұмытпағанымыз абзал. Сондықтан санитарлық жұмыстардың жүйелі жүргізілуінің мәні осында. Бұл – бір. Екіншіден, тұрмыстық қатты қалдықтар кез келген жерде шашылып жатса, көшенің де көркі қашады. Ауыл, елдің сәні бұзылады. Сол үшін «Бірлесе көтерген жүк жеңіл» демекші аудан тазалығына жоғары жауапкершілік танытайық.