Орталық коммуникациялар қызметі алаңында өткен баспасөз мәслихатында Асқар Жақыпбаев еліміздегі ветеринария саласына тоқталды. Сөзінше, бүгінде ел бойынша 12,2 мың ветеринар дәрігер бар екен. Бірақ әлі де бұл салада 800 маман жетіспейді. Былтыр республика бойынша жалақы 50 процентке көтерілген. Осылайша жоғары білімі бар ветеринарлардың жалақысы биыл 145-282 мың теңге аралығына жетіп отыр.

«Еліміздің 12 өңірінде жалақы 200 мың теңгеден жоғары. Ал 6 өңірде ветеринарлар 170-200 мың теңге аралығында еңбекақы алады. Осы орайда айта кеткім келеді, 145 мың және 151 мың теңге көлеміндегі жалақы тек Шымкент қаласы мен Қызылорда облысында ғана», – деді Асқар Жақыпбаев.

Сонымен қатар ол енді ветеринар дәрігерлердің мәртебесі заңмен бекітілетініне де тоқталды.

«Өкінішке қарай, 11/93 қаулысына сәйкес ветеринарлардың мәртебесі заңмен нақтыланбаған. Құжатта ветеринарлар туралы «тағы сол сияқты» деген бөлікте айтылған. Сондықтан алдымен, ветеринар дәрігерлердің мәртебесі бекітіледі. Ұстаздарда, дәрігерлерде бар, ал ветеринарларда мәртебе жоқ», – деді ол.