Майталман маман мәртебесі

Аймақ басшысы Қазалы ауданына сапары барысында ауыл шаруашылығы саласының майталманы, белгілі қоғам қайраткері, Қазалы ауданының құрметті азаматы Қасқырбай Әлімбайға “Ауыл шаруашылығы саласының үздігі” төсбелгісін табыстады.

Аймақ басшысы Жалаңтөс батыр серіктестігінің директоры, аудандық мәслихат депутатының ел алдындағы еңбегі елеулі екенін атап өтті.

– Сыр бойында елдің ынтымағын жарастырып, халықтың ырысын арттырып жүрген абыройлы азаматтар аз емес. Солардың бірі – Қасқырбай Әлімбайұлы. Ол өзінің білімі мен мол тәжірибесін ауылшаруашылық саласы мен аудан экономикасының дамуына жұмсап келеді. Оның үстіне биыл Қасқырбай Әлімбайұлы мерейлі 70 жасқа толуына орай және Сыр өңірінің әлеуметтік-экономикалық дамуына қосқан үлесі үшін облыстың ең жоғарғы марапаты Қызылорда облысының “Құрмет Грамотасы” табысталған болатын. Енді бүгінгі сәтті пайдалана отырып, “Ауыл шаруашылығы саласының үздігі” төсбелгісін тағып отырмыз. Жас кәсіпкерлерге, басшыларға осындай азаматтың жолын берсін, – деді облыс әкімі.