Өңірлерді дамытудың 2020-2025 жылдарға арналған мемлекеттік бағдарламасы бойынша Қазалы қаласын газбен жабдықтау құрылысы жүргізілді. Жоба құны 1026,9 миллион теңге. Бас мердігері «МБК Құрылыс» ЖШС. Нысан 2022 жылдың сәуір айында пайдалануға қабылданды. Нысан бойынша 58,914 шақырым газ желісі тартылды. ПГБ-1 дана, ГРПШ-9 дана орнатылды. Жоба бойынша 1565 тұрғын үй, 28 мекеме-кәсіпорын және 51 кәсіпкерлік нысан көгілдір отынмен қамтылмақ. «Ауыл-ел бесігі» бағдарламасы аясында Басықара елдімекеніне орамішілік газ желілерінің құрылысы жүргізілуде. Бас мердігері «Ремстрой» ЖШС нысанды қазан айына тапсыруды жоспарлап отыр. Бүгінгі күні құрылыстың 80 проценті орындалған. 18500 метр жоғары, орта, төмен қысымды газ желілері жүргізіліп, 2 дана газ тарату қондырғылары монтаждалған. Сонымен қатар жобада 247 тұрғын үйді, 10 әлеуметтік, мәдени, денсаулық сақтау және басқа да нысандар табиғи газбен жабдықтау қамтылған. Қ.Пірімов елдімекенінде де орамішілік газ желілерінің құрылысы жүргізіліп жатыр. Қазір 80 проценті орындалды. Бұнда 12500 метр газ желілері жүргізіліп, 2 дана газ тарату қондырғылары монтаждалған. Сондай-ақ жобада 235 тұрғын үй, 6 әлеуметтік нысандарды табиғи газбен жабдықтау қамтылған. Ал Жалаңтөс батыр елдімекеніне жүргізіліп жатқан орамішілік газ желілері осы жылдың қыркүйек айына тапсыру жоспарлануда. Аталған құрылыстың 50 проценті орындалған.

«Ауыл – ел бесігі» бағдарламасы аясында Құмжиек ауылдық округі, Қ.Пірімов ауылынан спорт кешенінің құрылысы 2021 жылы басталған. Бас мердігері «Ахат+ГС» ЖШС. Құрылыс монтаж жұмыстары аяқталып, қабылдау жұмыстары жүруде.

Аудандық құрылыс бөлімі мамандарының берген мәліметіне сүйенсек, аудандық бюджет қаражаты есебінен Әйтеке би кентінің, «Достық» шағын ауданындағы спорт алаңының құрылысын бас мердігері «Болашақ» ЖШС салған. Ол сәуір айында пайдалануға берілді. «SCS Инжинеринг» ЖШС-нің жұмысы Қазалы қаласындағы Ү.Түктібаев көшесінде орналасқан шағын футбол алаңында балалар уақыттарын көңілді өткізуде. Шәкен елдімекенінде спорт ойын алаңын орнату жұмыстарына 8,6 миллион теңге бөлінген. Бас мердігері «Инженер строй групп» ЖШС маусым айында пайдалануға берді. Байқожадағы спорт ойын алаңы да ел игілігіне қызмет етуде. Алдағы уақытта Ү.Түктібаев ауылындағы ағайын да қуанышқа кенелмек.

– Кәукей ауылында салынып жатқан 100 орындық ауылдық клуб құрылысын бастауға облыстық бюджеттен 10,0 миллион теңге қаржы бөлініп, игерілді. Нысанның іргетасы қаланып, қабырға кірпішін өру жұмыстары жүруде. Ол 2023 жылға өтпелі. Ал кенттегі Аймақаш мөлтек ауданын жаңа кварталдарын инженерлік инфрақұрылыммен қамтамасыз ету (жолдар салу) құрылысын қыркүйек айында аяқтау межеленуде. Қазір жалпы ұзындығы 5,4 шақырым қиыршық тасты жол құрылысы жоспарланған. Бүгінде 19 көшеге шеге құм, саз топырақ төселіп, 10 көшеге ГПС төсеу жұмыстары атқарылды.

Әйтеке би кентіндегі көлемі 210 гектар жер учаскесіндегі инфрақұрылым құрылысы жобасында қалып қойған тұрғын үйлерді төмен қысымды газ желілерімен және 0,4 кВ электр желісімен жабдықтау нысаны жобасын қаржыландыруға 2022 жылға республикалық бюджеттен 156,780 миллион теңге қаржы бөлінді. Қазір мемлекеттік сатып алу конкурсы жүруде, – дейді бөлім басшысы.

Бұдан бөлек ауданда 250 орындық мектеп ғимаратының құрылысы жүруде. Нысан 2021 жылдан өтпелі.

2022 жылға 411,974 миллион теңге қаржы бөлініп, құрылыс-монтаж жұмыстары атқарылуда. Бас мердігері «СКС Инжиниринг» ЖШС. Ағымдағы жылдың қараша айында пайдалануға қабылдау межеленіп отыр. 600 орындық мәдениет үйінің құрылысы да 2021 жылдан өтпелі. Бас мердігер «ҚазҚұрылыс Сервис» ЖШС ағымдағы жылдың қыркүйек айында пайдалануға беруді жос­парлап отыр.

Қазалы қаласынан салынып жатқан 140 орындық балабақша құрылысына бас мердігер «СМП Қызылорда» ЖШС жауапты. Сарыкөл ауылдық округі, Жұбан елдімекеніндегі медициналык бекет нау­рыз айында келушілерге есігін ашты.