Өңірде заңсыз есірткі өсіру өршіп тұр. Бұл туралы аудан әкімдігінде өткен көшпелі семинарда ҚР Ішкі істер министрлігінің есірткіге қарсы күрес департаментінің бас маманы Бахытжан Әмірханов мәлім етті. Оның айтуынша, облыс көлемінде өткен жылы 83 заңсыз егілген сора алқабы анықталған. Құқық қорғау органдарының жедел тексеру шарасы барысында жалпы салмағы 89 тонна есірткі заты тәркіленіп, қара нарыққа шығуына тосқауыл қойылды. Негізгі шоғыры Қызылорда қаласы мен Шиелі және Сырдария аудандарында орналасқан. Соңғы кездері Қазалы мен Аралда да есірткі егу белең алуда. Себебі, Сыр өңірінің климаты сора егуге өте қолайлы. Есірткі уақытылы суарылса, ыстыққа жақсы өседі екен. Дегенмен, бұл іспен айналысқандар заңмен жазаланатындықтан арам пиғылдарын жасырын іске асырады.

Мамандардың дерегінше, егуге тыйым салынған сора қара нарықта келісі 350-500 мың теңгеге саудаланады. Ресейде 1 миллион теңгеге дейін бағаланады-мыс. Осындай оңай олжаға кенелуді көздегендер саны артып бара жатқандығы құқық қорғау өкілдерін қатты алаңдатуда.

Сондай-ақ, есірткі бизнесіне қарсы күресті жандандыруды мақсат тұтқан ҚР Ішкі істер министрлігінің М.Есболатов атындағы Алматы академиясының кафедра бастығының орынбасары Әділ Тұлмағамбетов ауылдық округ әкімдері мен учаске полицияларын, ауылшаруашылық, жер қатынастары бөлімдерін бірлесе жұмыс атқаруға шақырды. Көшпелі оқу курсында есірткі заттарын тәркілеу операциясы кезінде түсірілген бейне жазбалар арқылы қара сора өсімдіктері қандай болатындығы көрсетілді.

Маңызды басқосуда Қызылорда облыстық ішкі істер департаменті есірткі бизнесіне қарсы күрес басқармасының өкілі, полиция подполковнигі Ғалымжан Мүсірепов заңсыз егілген сора алқаптарын байқаған жағдайда 102 сенім телефонына хабарласу қажеттігін айтты. Құнды мәлімет бергендерге ақшалай сыйақы берілетіндігін әрі құпиялылық сақталатындығын мәлім етті.

Көшпелі семинарды ашып, қорытындылаған аудан әкімінің орынбасары Совет Бабанаев ауданда егістік алқаптары мен орман қоры жерлерін пайдаланушыларымен түсіндірме жұмыстарын жүргізіп, бос жерлерді зерделеп отыру керектігін алға тартты.