«Атадан мал қалғанша, тал қалсын» деген сөздің астарына жете білген Әйтеке би кенті әкімі Қайрақбай Орынбасаров: «Сәтін салса вокзал маңындағы Әйтеке би ескерткіші орналасқан бақты орманға айналдырамыз» дейді. Ол үшін биыл онда 300 түп ағаш отырғызылған екен. Ал оларды суарудың да тиімді жолын қарастырып қойған жауаптылар бақтың төрт бұрышына жерден 8-9 метрден су шығаратын қондырғы орнатқан.

– Өздеріңіз көргендей, бақ жылдан жылға азып бара жатыр. Жуырда онда кенттің ерікті жастары ағаш отырғызды. Одан бөлек әртүрлі гүл егілді. Бұрынғы мен бүгінгі талдарды күтімге алу әрдайым қадағаланады. Айтып өткендей, биыл қондырылған қондырғы арқылы вокзал маңын суарып отырмыз, – дейді Қайрақбай Жақсыбайұлы.

Суарудың тиімді жолын таба білген жауаптылар құрылғыны әуелден ойластырған. Өйткені өзге жердегі ағаштарға су құю бұрын оңай болмады. Ал бұл жолы барлығы басқаша болады. Жаңа қондырғы 10 метрге жуық қашықтықта жатқан суды жер бетіне шығарды. Сол арқылы бақтың барлық жеріне су жетеді.

Табиғаттағы тепе-теңдікті сақтап тұратын осы отырғызылған ағаштар. Ыстықты, аязды басып, ылғалдылықты сақтап, жаңбырдың уақытында және табиғи тәртіппен жаууын реттейді. Топырақтың құнарлығын сақтап, дауылдың екпінін азайтады. Қысқасы, адам өмірге келгеннен кеткенге дейін игілікке жарайды. Сондықтан бабалар ағаш отырғызуды ұрпаққа мұра қалдырғанмен пара-пар санаған. Ендеше ауданның әрбір тұрғынына Әйтеке би кенті әкімі айтқандай, аталған бақтың орманға айналғанын көретін күнді бұйыртсын.