Қызылорда қаласында қырым қанды безгегінің 11 ошағы анықталды
Биыл қала бойынша конго-қырым геморрагиялық қызбасы ауруының қолайсыз аймақтары ретінде 11 ошақ есепке алынды.Осыған байланысты кезекті эпидемиялық маусымда 14 сәуірден бастап аурушаңдықтың алдын алу мақсатында залалсыздандыру басталды, деп хабарлайды Экспресс К.
"Биыл эпидемиялық маусымында кенеге қарсы дезинфекция жұмыстары алдында жүргізілген энтомологиялық барлау барысында Иіркөл, Тасбөгет, Белкөл қолайсыз аймақтарында табиғаттан және ауыл шаруашылық малдарынан серопозитивті кенелер анықталып отыр. Осы орайда, көктемгі эпидмаусымда барынша сақтық шараларын қатаң сақтауымыз керек. Кене малдың үстінде болатындығын ескере отырып, малды алдын ала ерте көктемде кенеге қарсы егіп, мал қорада кенеге қарсы улау жұмыстарын жүргізу керек", — деді Қызылорда қалалық санитариялық-эпидемиологиялық бақылау басқармасының басшысы Ерлан Ұзақбаев.
