Ардагерлер кеңесінің төрағасы Оразғали Бекбанов өздері орналасқан ғимараттың тарихымен таныстырды. Мұнда тынығу орындары мен жаттығу жасайтын түрлі құрылғылар бар.

Облыс әкімінің орынбасары мұнан соң Жалаңтөс батыр атындағы орталық стадион, аудандық оқушылар үйі, 600 орындық мәдениет үйінің ғимаратына да арнайы ­барып, мекеме жұмысымен танысты.

Әйтеке би кентіндегі «Жеңіс» саябағына да ат басын бұрып, оның тарихымен танысты. Саябақ ішінде орналасқан ескерткіштер туралы аудандық мәдениет және тілдерді дамыту бөлімінің басшысы Болат Жолтаев айтып берді.

Сондай-ақ, Әйтеке би кенті мен Қазалы қаласының екі аралығынан Жалаңтөс батырдың 445 жылдығына орай еңселі ескерткіш салынып жатқан аумаққа барды.

Қазіргі таңда ескерткіш айналасында аумағы 800 шаршы метр болатын жер абаттандырылуда. Жоба бойынша ескерткіш айналасы қоршалып, бас қақпа орнатылады. Сондай-ақ, 2 дана ротонда салынып, 3808 шаршы метр жерге брусчатка төселеді. Темір бетонды аяқсу арықтарын орнатылып, көлік тұрағын салу қарастырылған. Сонымен қатар, 30 дана жарықшам, 20 отырғыш пен қоқыс жәшіктері және нысанға жақын орналасқан электр желілері жаңартылатын болады.