Тасарықты тұрғындар түрлендіруде
Тасарық ауылдық округі бойынша наурыз айынан бері көркейту-көгалдандыру және абаттандыруға қатысты бірқатар шаруа атқарылды. Округке қарасты Тасарық, Лақалы, Тасөткел елді мекендерінде барлық мекеме қызметкерлері мен жұмысшылары наурыздың 13-нен әр сенбі сайын аулалардағы және ауылдық бақтардағы ағаштардың түптерін әктеді. Ауыл көшелерін артық қоқыстан тазалап, жиналған тұрмыстық заттарды арнайы орынға апарып залалсыздандырды. Осылайша тасарықтықтар дәстүрлі сенбілікті үзбей жалғастыруда. Ерікті азаматтар мен мекеме қызметкерлері елге еңбегі сіңген тыл ардагерлерінің аулаларына абаттандыру жұмыстарын жүргізді. Округ бойынша “Ағаш отырғызу” акциясы қолға алынды. Мекемелер мен кәсіпорындар өз аулаларына ағаш көшеттері мен қаламшалар отырғызды. Тұрғындар арасында “Әр үйден бір тал” атты челленджі ұйымдастырылып, ағаш көшеттерін отырғызды.Тасарық ауылының кіре берісінде орналасқан жолдың екі жағындағы “Жасыл белдеу аймағы” бойынша қоршалған бақ егілген жердің қолайсыздығына орай құнарлы жерге көшірілді. Лақалы ауылындағы Социалистік еңбек ері Кәрібоз Әлімаевтың атындағы бақты ыңғайлы жерге көшіру қолға алынуда.
Округтегі мекеме, шаруашылық құрылымдары және тұрғындармен қоса есептегенде сенбілікке 206 адам тартылды. Тасарық ауылына, Лақалыға, Тасөткелге барлығы 145 ағаш отырғызылды.
Алдағы уақытта көркейту-көгалдандыру және абаттандыру бойынша Тасарық ауылының жігерлі жігіт ағалары ауылдың кіре берісіне арка орнатуды көздеп отыр. Бүгінде оның іргетасын құю үстінде.
– Аяқ сумен қамтамасыз ету мәселесі тығырыққа тіреуде. Өйткені Тасарықта жердің тегіс болмауынан су жүргізетін арықтарды қазу мүмкіндігі болмай тұр. Осыған сәйкес қауырсын құбырларды жер астымен жүргізу арқылы ауылды аяқсумен қамту жоспарда бар. Күрмеуі қиын жағдайдың шешу жолдары табылса, Лақалы, Тасөткел елді мекендеріне де дәл осылай аяқ су құбырын жүргізу ісі қолға алынатын болады, – дейді Тасарық ауылдық округінің әкімі Әлмұхан Кәрібаев.
Оның айтуынша, ауылдық бюджет есебінен Тасарық ауылының орталығына жастарға арналған саябақ орнату сызбасы әзірленуде. Осы ретте ауыл жастары бірігіп, саябақ алдына “I love Tasaryk” монументін орнатпақ.
Ауылдық округте көркейту-көгалдандыру және абаттандыру жұмыстары мұнымен бітпей, алдағы уақытта да жалғасын таба бермек.
Айнұр ҚАЗМАҒАМБЕТОВА
