Махаббат пен шығармашылық педагогикасы
Қ.Пірімов атындағы №103 орта мектебінде «Өзін-өзі тану: махаббат пен шығармашылық педагогикасы» тақырыбында өзін-өзі тану онкүндігі ұйымдастырылды.Онда 4-10 сыныптар арасында «Алтын жүрек анамыз» тақырыбында мәнерлеп оқу сайысы өткізілді. 2-10 сыныптықтар «Жас суретшілер» атты көрме жасап, еркін тақырыптағы салған суреттерін көпшілік назарына ұсынды.
Қайырымдылық іс-шаралары да қамтылды. Мектеп психологы Жанар Қуанышбай 10 сынып, технология пәнінің мұғалімі Жанна Кушпанова 7 сынып оқушыларымен бірге Әйтеке би кентіндегі «Шапағат» мүмкіндігі шектеулі балалар орталығында болып, бүлдіршіндерге концерттік бағдарламаларын қойып, сыйлықтарын үлестірді. 4-10 сыныптағылар «Байлық, сүйіспеншілік, махаббат» атты қойылымдарын көрсетті. Жақсылықтар жасауға тәрбиелеу, өнерге қызығушылықты арттыру мақсатындағы онкүндікке оқушылар белсене қатысып, ұйымшылдық танытты. Өзін-өзі тану пәнінің музыка, сурет, еңбек сабақтарымен тығыз байланыса жүргізілетінін терең ұғынды.
Қорытынды кеш үстінде мектеп директоры Сейілхан Бердібекұлы бірқатар мұғалімдер мен шәкірттерге марапаттауларын тапсырып, оларды қол жеткізген жетістіктерімен құттықтады.
Нұржамал ІДІРІСОВА,
Жалаңтөс батыр ауылы.
