Ең әуелі күндіз бір мезгіл таза ауада серуендеуге уақыт бөлген жөн. Мұның иммунитетке берері көп. Сонымен қатар күн сәулесі сергектік беретін гормонды "оятып", сезім сыйлайды. Сондықтан күндізгі серуенді әдетке айналдырыңыз. Күн бұлтты болса да таза ауада серуендегеннің пайдасы мол. Оны адам көп ұзамай-ақ сезінеді.

Егер қуатыңыз азайып, қан қысымы тым төмендеп кетсе, онда сермене (лимонник), бүлдірген (земляника) ерітінділерін ішкен дұрыс. Асқазан көтерсе, гипертония қаупі болмаса, онда табиғи кофе ішкен пайдалы. Алайда кофе бір сәттік сергектікті ғана сыйлай алады.

Бірнеше минуттық жаттығу сізге күні бойына сергектік беретіні рас. Осы теорияға бір күніңізді бөліп, тәжірибе жасап көріңізші. Мұны тек таңертең ғана жасау міндетті емес. Өзіңізді көңілсіз немесе жабырқау сезінген сәтте жаттығу сізге көмектеседі.

Үйдің қара көлеңке емес, жарық болғаны жөн. Жан-жағыңызда ашық түсті заттардың көбірек болуын қадағалаңыз. Үстелде, кереуетте, отыратын, жататын жерде ашық түсті заттар тұрғаны жақсы. Қара, сұр түстерден аулақ болыңыз және қызыл, қызғылт, сары, жасыл түстеге үйір болыңыз. Тіпті ас ішетін ыдысыңыз да ашық, гүлді түсте бол­ғаны дұрыс.

Ал ағзада серотонин көбірек түзілуі үшін ас құрамында «Омега-3» қанықпаған майлы қышқылдарының мол болуына көңіл бөліңіз.  Олар теңіз балығы мен теңіз өнімдерінде, зәйтүн мен зығыр майында көп. Теңіз балығында ағзаға аса қажет Д дәрумені де мол.

Қыста ағзада «ұйқы гормоны» – мелатонин көбейеді. Керісінше, «қуаныш гормоны» – серотонин түзілуі азаяды. Бұл ұйқы басуына, көңіл-күйдің түсуіне, жиі құбылуына себеп болады. Сол себепті ұйқы режиміне мұқият болыңыз. Күндіз сергек жүру үшін түнгі ұйқыңыз қанық және тыныш болуы қажет.