Әлемде санитарлық дағдарыс кезінде 1 млрд астам бала мектепке бармады
Әлемде санитарлық дағдарыс кезінде 1 миллиардтан астам бала мектепке бара алмады. Мұндай мәліметті Экономикалық ынтымақтастық және даму ұйымы жариялады.Оқушылар қашықтан сабақтардың 28-ден 56 процентіне қатысқан немесе мүлде қатыспаған. Зерттеушілер «енді мұның зардабын болашақта тартамыз» деп қауіптенеді. Сондықтан қазір індет деңгейі өссе де мектептерді жаппау керек деп есептейді. Аталған ұйым мамандары білім саласына қаржыны көбейтіп, педагогтарды жан-жақты қолдау керек деген ұсыныс айтады. 2008 жылғы экономикалық дағдарыстан кейін әлемдегі әрбір оныншы бала мектепті мүлде тастаған. Матиас Корманн, экономикалық ынтымақтастық және даму ұйымының Бас хатшысы: - Коронавирус осы індетке дейін де білім саласында болмаған теңсіздіктің барын көрсетіп берді. Бұрыннан сабақ оқып жарытпай жүрген жағдайы төмен отбасыдан шыққан балалар осы жолы да қатты зардап шекті. 2018 жылы жүргізілген Пиза зерттеуі әлеуметтік-экономикалық жағдайдың білім алу көрсеткішіне тікелей әсер ететінін көрсеткен еді.
