Дүниежүзілік денсаулық сақтау ұйымы өзі ұйымдастырған Solidarity зерттеулерінің келесі кезеңі басталғанын мәлімдеді. Ол Solidarity PLUS деп аталды. Оның барысында COVID-19-ға қарсы тағы 3 препараттың тиімділігі стационарлық жағдайда ауруханаға түскен науқастардың қатысуымен сыналады. Бұл препараттар – артесунат, иматиниб және инфликсимаб. Оларды тәуелсіз сарапшылар комиссиясы коронавируспен ауруханаға түскен науқастар арасында өлім санын азайтады деген сеніммен таңдап алған. Олар қазіргі кезде басқа ауруларды емдеуде пайдаланылады. Мысалы, артесунат безгектің ауыр түрін емдеуде қолданылса, иматиниб қатерлі ісіктің кейбір түрлерін емдейді, ал инфликсимаб Крон ауруы сияқты иммундық жүйе сырқаттарында және ревматоидті артритте қолданылады. Solidarity PLUS зерттеулеріне 52 елдің 600 стационарлық медициналық мекемесінен мыңдаған зерттеуші қатысуда. Бұдан бұрын зерттеулер аясында төрт препараттың тиімділігі бағаланған болатын. Зерттеулердің қорытындысы бойынша, ремдесивир, гидроксихлорохин, лопинавир және интерферон препараттарының COVID-19-бен ауруханаға түскен науқастардың өліміне әсері жоқ немесе әсері болмашы деген түйін жасалған.