Арнаның хабарлауынша, Германия Oxford-AstraZeneca вакцинасына деген көзқарасын өзгертіп, егде жастағыларға аталған вакцинаны егуге рұқсат берген. Бағдарлама авторларының айтуына қарағанда елдегі денсаулық сақтау басқармасы аталған вакцинаны 65 жастан жоғары тұрғындарға егуге рұқсат бермегендіктен халық екпеге сенімсіздік танытқан. Соның әсерінен елде көптеген доза қолданылмай қалған.

Түрлі зерттеулер нәтижесі AstraZeneca вакцинасы егде жастағыларға да жақсы әсер ететінін дәлелдеген. Осыдан соң Бельгия үкіметі осы аптада Франциядан кейін қарттарға вакцина салдыруға рұқсат беретінін айтқан.

Әзірге германиялықтардың тек 5 проценті ғана екпенің алғашқы дозасын салдырған. Енді Меркель вакцина салдыратын адам қатарын көбейтуді көздеп отыр деп тұжырымдайды арна тілшілері.

ЕО-ның медициналық реттеушілері қаңтарда AstraZeneca вакцинасының барлық жастағы адамдарға әсер ететінін хабарлаған. Франция президенті Макрон қаңтарда «вакцина үлкен жастағыларға тиімсіз» деп жариялады. Алайда Ұлыбритания үкіметі бұл тұжырымдаманың жалған екенін айтты. Осы сөздер AstraZenecaның сатылымы мен вакциналау науқанының тұралап қалуына әкеп соқты.

Ал бұған дейін кез келген жастағы адамға тиімді деп екпе салуды бастаған Ұлыбритания алғашқы дозаны 20,7 млн адамға ұсынды. Осыған байланысты өткен аптада Неміс иммунология қоғамының басшысы Карстен Ватцл AstraZeneca екпесіне деген ойын өзгертуді сұрады.

ВВС арнасына берген сұхбатында ол атқарушы органға вакцинаны қарттарға салдыруға рұқсат беріп, Ангела Меркельге тікелей эфирде оның қауіпсіз екенін дәлелдеу керектігін айтты.

Вакциналау науқаны жоспардағыдай өтсе елде шектеу шаралары жеңілдетілмек. Бұл туралы канцлер AstraZeneca вакцинасын барлық жастағыларға салуға рұқсат беру туралы жиын өткізгенде хабарлады. «Жұқтырушылар қатары күрт көбейсе «шұғыл тежеу» шаралары қабылданады» деді Меркель. Сонымен қатар ол пандемияның жаңа толқыны басталғанын, оған жақсылап дайындалу қажеттігін айтты.