Ренжіткен адамға не деуге болады?
Жұмыр басты пенде болып жаратылғандықтан болар кейбір сәтте бір-бірімізге ауыр сөздер айтып, зілмен сөйлеп ашуға берілеміз. Мұндай жағдайда жан жүрегіңді жаралағанға қандай қадам жасау керек? Оған ислам әлемінде сабырмен қарап, дұрыс шешім қабылдауға ой салатын ғибратты әңгімелер жетерлік. Бірде шәкірті ұстазынан:
– Ұстаз, егерде мені біреу ренжітсе, қатты сөйлеп, көңіліме тиер ауыр сөз айтса, оған қандай жауап қатуым керек? – деп сұрайды.
Ұстазы:
– Сен ағаштың түбінде отырсың делік. Бір кезде басыңа ағаштың бір шыбығы түсіп кетті. Қандай әрекет жасайсың? – дейді.
Шәкірті бірден жауап береді:
– Не істейсің дейсіз бе? Бұл жай сәйкестік қой. Бір тал шыбықтың мен отырған кезде басыма түсуі сәйкестік қана ғой.
Сонда ұстазы:
– Міне, дәл осылай. Біреу ашуға беріліп, ызаланып, сені кемсітіп, сені емес, өзін төмендетті. Ол ағаштан жерге түскен талдай нәрсе. Бір шыбыққа бола сен уайым-қайғыға салынбайсың ғой. Сондықтан ол адам сені алаңдатпасын, – деп жауап береді.
