Қазақстанның басты ұлттық құндылықтарын биікке көтеретін Елбасының: «Рухани жаңғыру: болашаққа бағдар» бағдарламасы тың серпінмен жүзеге асырылуда. Осыған орай Ы.Алтынсарин атындағы №204 орта мектепте «Сәлем саған, туған ел» атты концерттік кеш ұйымдастырылды.

Аталған бағдарламаны ілгерілету және үйлестіру, жас ұрпақтың бойына туған ел мен жерге деген патриоттық сезімін ояту мақсатында өткен жиында аудандық білім бөлімінің әдіскері Р.Үмбетов пен аудандық тарихи-өлкетану музейінің директоры С.Әлішов қатысып, балаларға шығармашылық шарықтау тіледі.

Шатыққа толы кеште ән байқауларда жүлделі орындарға қол жеткізіп жүрген А.Өтемағанбет, Б.Берекетова, К.Бақытқызы, Г.Қуанышбай, А.Төремұрат, Ж.Қуаныш, тағы басқалары өз өнерлерімен көрермендерді баурап алды.

Тағылымды басқосуда жас өнерпаздар «Бәрінен де сен тәтті», «Ана-әке», «Балдәурен», «Қазақстаным» атты әндерден шашу шашып, мың бұрала би биледі. Дарынды оқушылардың өнерлеріне тәнті болған №204 орта мектептің директоры Т.Шермаханов жас өрендерге өмірде ақ жол тілеп, ыстық ықыласты лебізін білдірді.