Елбасының «Болашаққа бағдар: Рухани жаңғыру» бағдарламалық мақаласында қозғалған өлкетану ісін дамыту мәселесі Қызылордада өткен тарихшылар слётінде талқыланды. Келелі басқосуда Сыр өңірі тарихының зерттелуі мен «Өлкетану» пәнін оқытудың өзекті мәселелері баяндалды. Оқытушылар «Туған жер», «Туған ел» бағдарламасы шеңберінде жастарға тәрбие, білім беруді жетілдіру жолдарын да ұсынды. Бүгінде Қызылорда облысындағы орта мектептерде «Өлкетану» пәні қалыптасқан әдістемелік бағдарлама негізінде оқытылып жатыр. Ал келесі жылы 5-7 сыныптарға арналған арнайы оқулық жарыққа шығады.

Дастан Сәтбай, тарих ғылымдарының докторы: – Жер-жерлерде оқулықтар жазылып жатыр. Біздің Қорқыт ата университетінде де методикалық кеңеспен бірігіп, облыстық білім беру департаментімен оқулық дайындалуда. Пән мұғалімдеріне үлкен көмекші құрал болады ғой деп ойлаймын. Қазір аяқталып болды. Баспада дайындалып жатыр, жаңа жылдан кейін шығып қалады деп ойлаймын.