Ғасырлық ғимаратқа жаңа тыныс
Қазалыдағы ғасырдан астам тарихы бар теміржол вокзалы қайта жаңғыртылып, ел игілігіне берілді. Бұл – тарихи сәулет мұрасын сақтай отырып, оны заманауи талаптарға бейімдеудің маңызды үлгісі.ХХ ғасырдың басында Орынбор–Ташкент теміржол магистралі бойында салынған ғимараттың өзіндік сәулеттік ерекшелігі бар. Іргетасы Ақирек тауынан жеткізілген тастан қаланып, қабырғасы күйдірілген кірпіштен өрілген. Нысан 1980 жылы архитектуралық ескерткіш ретінде есепке алынған.
Жаңғырту барысында іргетасы мен қабырғалары күшейтіліп, шатыры жаңартылды. Күту залдары заманауи жабдықтармен қамтамасыз етіліп, мүмкіндігі шектеулі азаматтарға қолайлы жағдай жасалды. Сонымен қатар ана мен бала бөлмесі, медициналық пункт және қауіпсіздік жүйелері қарастырылған.
Жобаның маңызды бөлігі – вокзал маңындағы инфрақұрылымның жақсаруы. Теміржол үстіндегі жаяу жүргіншілер көпірінің іске қосылуы Әйтеке би кентінің теміржолдың арғы бетінде тұратын 13 мыңнан астам тұрғыны үшін қауіпсіз қатынауға мүмкіндік берді.
Қазір аудан аумағындағы 91 шақырым теміржол желісі арқылы тәулігіне 12 жолаушылар пойызы өтеді. Сондықтан жаңғыртылған нысанның аудан тұрғындары мен жолаушылар үшін практикалық маңызы зор.
Ең бастысы – ғасырлық ғимараттың тарихи келбетін сақтай отырып, оны қазіргі заман талабына сай қоғамдық кеңістікке айналдыру. Бұл – өткенге құрметпен қарап, болашаққа бағытталған маңызды қадам.
