Сот отырысының хатшысы – сот төрелігінің маңызды буыны
Сот жүйесінде әрбір қызметкердің атқаратын міндеті маңызды. Сот төрелігінің сапалы әрі уақтылы жүзеге асуы судьяның кәсіби біліктілігімен қатар, сот аппараты қызметкерлерінің де жауапкершілігі мен үйлесімді жұмысына байланысты. Осы орайда сот отырысының хатшысы қызметінің маңызы ерекше.Сот отырысының хатшысы – сот процесінің ұйымдастырылуына, оның барысының тиісті тәртіппен рәсімделуіне және іс жүргізу құжаттарының уақытылы дайындалуына жауапты маман. Бұл қызмет үлкен ұқыптылықты, сауаттылықты, сабырлылықты және заң талаптарын жетік білуді қажет етеді.
Сот отырысының хатшысы сот процесіне қатысушыларды хабардар ету, олардың сот отырысына қатысуын қамтамасыз ету, сот отырысының хаттамасын жүргізу, сот процесінде қабылданған шешімдер мен өзге де іс жүргізу әрекеттерін тиісті түрде рәсімдеу жұмыстарын жүзеге асырады.
Әсіресе, сот отырысының хаттамасын жүргізу – аса мұқияттылықты талап ететін жұмыс. Өйткені сот процесінің барысы, қатысушылардың түсініктемелері, өтінішхаттары мен соттың іс жүргізу әрекеттері хаттамада нақты әрі толық көрініс табуы тиіс. Сондықтан бұл қызметте әрбір сөзге, әрбір құжатқа және белгіленген мерзімдерге жауапкершілікпен қарау маңызды.
Сот отырысының хатшысы болу – тек құжаттарды рәсімдеу ғана емес, сонымен қатар сот жұмысының үздіксіздігін қамтамасыз етуге үлес қосу. Бұл маманнан кәсіби тәртіпті, мемлекеттік қызметшінің әдеп нормаларын сақтауды және азаматтармен қарым-қатынаста сыпайылық танытуды талап етеді.
Қорыта айтқанда, сот отырысының хатшысы – сот төрелігін жүзеге асыру процесіндегі маңызды тұлғалардың бірі. Оның күнделікті көзге көріне бермейтін, алайда үлкен жауапкершілікті талап ететін еңбегі сот жүйесінің тұрақты әрі жүйелі жұмыс істеуіне негіз болады.
Сот отырысының хатшысы болу – жауапты міндет, ал сол міндетті адал атқару – кәсіби біліктілік пен азаматтық жауапкершіліктің көрінісі.
Руслан АБАЕВ,
Қазалы аудандық сотының бас маман – сот отырысының хатшысы
