Тоқаев Конституцияны халыққа түсіндіру жұмысын Қаринге тапсырды
Президент Конституцияны халық арасында түсіндіру мен дәріптеу өте жауапты жұмыс екенін атап өтті.
Фото: АқордаПрезидент Қасым-Жомарт Тоқаев Қазақстан Халық Кеңесінің бірінші сессиясында Конституцияның мазмұны мен қағидаттарын халыққа кеңінен түсіндіру және дәріптеу мәселесіне тоқталды, деп хабарлайды Sn.kz ақпарат порталы.
Мемлекет басшысы азаматтар Ата заңның ережелерін жақсы біліп, оны күнделікті өмірде қолданған сайын Конституцияның маңызы арта түсетінін айтты.
«Конституция әр адамның қолында жүретін, жұмыс үстелінде тұратын, жеке кітапханасынан орын алатын құжат болуға тиіс деп есептеймін. Біз Конституцияда бекітілген қағидаттар мен құндылықтарды бүкіл ел болып дәріптеуіміз керек», – деді Қасым-Жомарт Тоқаев.
Президент Конституцияны халық арасында түсіндіру мен дәріптеу өте жауапты жұмыс екенін атап өтті.
«Аталған міндетті жүзеге асыруды Вице-Президент Ерлан Тынымбайұлы Қаринге тапсырамын. Жұмыстың барысы туралы екі аптада бір рет Президентке тіке баяндайды», – деді Мемлекет басшысы.
Осылайша, Конституцияны түсіндіру жұмыстарының барысы бойынша Ерлан Қарин Президентке әр екі апта сайын есеп беріп отырады.
