Еліміздің бірнеше өңірінде ауа сапасы нашарлайды
Ауа райының қолайсыздығына байланысты атмосферада зиянды заттардың жиналу қаупі жоғары
Фото: © istockphoto.com
«Қазгидромет» синоптиктері 19 қыркүйекте елдің бірнеше өңірінде қолайсыз метеорологиялық жағдайлар қалыптасатынын ескертті. Ауа райының қолайсыздығына байланысты атмосферада зиянды заттардың жиналу қаупі жоғары, деп хабарлайды Azattyq Rýhy «Қазгидрометке» сілтеме жасап.
Синоптиктердің болжамынша, Алматы, Қарағанды, Балқаш және Теміртау, сондай-ақ Орал, Атырау мен Ақтөбе қалаларында атмосфералық ауаның ластануы болжанады. Сондай-ақ Астана қаласында ауа райының бұл қолайсыз жағдайы түнгі уақытта байқалады деп күтілуде.
Қолайсыз метеорологиялық жағдайлар – бұл атмосфераның төменгі қабатында зиянды заттардың жиналуына ықпал ететін қысқа мерзімді факторлардың жиынтығы. Мамандардың мәліметінше, бұл қалаларда баяу жел, инверсия және тұман сияқты факторлар бірігіп, жерге жақын қабатта ластаушы заттардың шоғырлануына әкеп соғады. Мұндай жағдай адам денсаулығына тікелей әсер етуі мүмкін.
Ауаның ластануы кезінде мамандар келесі ережелерді сақтауды ұсынады:
1.Тас жолдар мен өндіріс орындарына жақын жерде ұзақ жүрмеген абзал.
2.Өкпе, жүрек-қан тамырлары аурулары бар және аллергияға бейім жандар өзімен бірге қажетті дәрі-дәрмектерін алып жүруі тиіс.
3.Таза ауада спортпен шұғылдануды немесе ауыр физикалық жұмыс істеуді уақытша тоқтата тұрған жөн.
