Болашағы зор бастама
«Ауыл аманаты» мемлекеттік бағдарламасы еліміздегі ауыл тұрғындарының әл-ауқатын арттыруға, өңірлердегі кәсіпкерлікті жандандыруға және жұмыссыздық мәселесін түбегейлі шешуге бағытталған маңызды бастамалардың бірі болып табылады. Аталған бағдарлама ауылдық жерлерде өз ісін ашқысы келетін немесе қолда бар бизнесін кеңейтуді жоспарлап отырған азаматтарға ерекше жеңілдіктер ұсынады. Несиелер жылдық өте төмен 2,5 пайыз мөлшерлемемен беріледі. Осы ретте қаржыландыру мерзімі бағытына қарай сараланады. Ауыл шаруашылығы кооперативтерін дамыту мен мал шаруашылығына 7 жылға дейін берілсе, қызмет көрсету, өндіріс және басқа да бизнес түрлеріне 5 жылға дейін қарастырылған.
Сонымен қатар бизнесті аяққа тұрғызып алу үшін негізгі борышты төлеу бойынша уақытша жеңілдік кезеңі (каникул) ұсынылады. Бағдарламаға ауылдық округ тұрғындары, өзін-өзі жұмыспен қамтығандар, жұмыссыздар мен жаңадан бастаған немесе жұмыс істеп тұрған шағын кәсіпкерлер қатыса алады. Басты мақсат – ауыл тұрғындарын тұрақты табыс көзімен қамтамасыз ету, ішкі нарықты сапалы азық-түлікпен және өнімдермен толтыру, сондай-ақ жастардың қалаға көшуін азайтып, ауыл инфрақұрылымын көтеру.Осы ауқымды мүмкіндікті тиімді пайдаланып, ауылдық жерде немесе шағын қалада автокөліктерге қызмет көрсету орталығын ашу бүгінгі күні ең өзекті әрі табысты бизнес-идеялардың қатарына кіреді.
Қазір әрбір ауылда жеке көліктердің саны артып, ауыл шаруашылығы техникалары мен жеңіл және жүк көліктеріне жыл бойы қызмет көрсету қажеттілігі туындап отыр. Қалаға бармай-ақ жергілікті жерде сапалы автожөндеу, дөңгелек монтаждау немесе май ауыстыру қызметтерін алу тұрғындар үшін үлкен қолайлылық тудырады әрі бәсекелестіктің аздығы аталған бизнеске тұрақты сұраныс қамтамасыз етеді.
Мұндай жобаны жүзеге асыру үшін несие қаражатын үй-жай сатып алуға немесе модульдік, қаңқалы шағын СТО ғимаратын тұрғызуға, сондай-ақ заманауи жабдықтармен қамтуға жұмсауға болады.
Атап айтқанда, көлік көтеруге арналған көтергішті, кілттер жиынтығын, диагностикалық сканерлерді, дөңгелек монтаждау және балансирлеу станоктарын, компрессор мен май ауыстыру құралдарын алуға мүмкіндік бар. Бұл бағытта табысты кәсіп бастау үшін нақты қадамдар жүйесін сақтау қажет. Бірінші кезекте, көрсетілетін қызмет түрлерін, қажетті қаржы мен өзін-өзі ақтау мерзімін айқындайтын сапалы бизнес-жоспар әзірленеді. Сонымен қатар көлік жүретін жолдың бойынан немесе елді мекен орталығынан меншік немесе жалға алу құқығы бар қолайлы жер учаскесі таңдалып, жеке кәсіпкер ретінде тіркелу жүзеге асырылады.
Бұдан кейін ауылдық округ әкімдігіне немесе өңірдегі микроқаржы ұйымдарына барып өтініш пен құжаттар тапсырылады. Бағдарлама шарттарына сәйкес талап етілетін кепіл мүлігі жетіспеген жағдайда «Даму» қорының кепілдігін пайдалану мүмкіндігі де қарастырылған. Осылайша мемлекеттік қолдауды тиімді пайдалану арқылы ауыл жерінде өзін-өзі жұмыспен қамтып қана қоймай, тұрақты жұмыс орындарын ашып, өңір экономикасының дамуына елеулі үлес қосуға болады.
Мемлекет тарапынан көрсетіліп жатқан жүйелі қолдаудың арқасында шалғай өңірлер мен аудан орталықтарында жаңа өндіріс орындары ашылып, тұрғындар тұрақты табыс көзіне қол жеткізуде.
Бір қуантарлығы аталған жоба аймақта да өз нәтижесін беріп келеді. Игі істердің легі жыл сайын кеңейіп келеді. Мәселен, «Ауыл аманаты» жобасы аясында 2023-2024 жылдары жалпы құны 883,6 миллион теңгені құрайтын 131 жоба қаржыландырылды. Нәтижесінде 174 жаңа жұмыс орны ашылды.
Ал 2025 жылы осы қарқын бәсеңдемей, 697,6 миллион теңгеге 95 жобаға қаражат бөлінді. Сонымен қатар 120 жұмыс орны құрылды. Берекелі бастамалардың ауыл экономикасына серпін беріп отырғанын көрсеткіштер айқын аңғартады.
Сандық деректер мен көрсеткіштер мұнымен шектелмейді. Биыл маңызды жобаны іске асыруға республикалық бюджеттен облысқа 5,6 миллиард теңге қарастырылған. Оның ішінде ауданға 88 жобаны жүзеге асыру үшін 850 миллион теңге бөлу жоспарланды. Аталған қаражат игеріліп, 103 жаңа жұмыс орны құрылады деп көзделген.
Жалпы алғанда, Мемлекет басшысының бастамасымен 2023 жылдан бері жүзеге асқан «Ауыл аманаты» бағдарламасын қаржыландыру бағытында аудан бойынша 200-ге жуық азамат өз ісін ашты. Олар сол уақыттан бері аудан экономикасының дамуына өзіндік үлесін қосып келеді.
Осы орайда мемлекеттік қолдауды тиімді пайдаланып, ел игілігі үшін еңбек етіп жүрген жаңа толқын кәсіпкерлерінің қатары көбейді. Солардың бірі – жеке кәсіпкер Асқар Қожаназаров. Табыс көзін дөп басқан азамат аудан орталығынан «Автокөліктерге қызмет көрсету орталығын» ашу мақсатында бағдарлама аясында 8,1 миллион теңге көлемінде жеңілдетілген несие алған болатын. Қазір орталықтың жұмысын бастап отыр.
Бүгінгі таңда ауылдық жерлерде жеке көлік санының артуына байланысты сапалы автожөндеу орталықтарына деген сұраныс жоғары. Кәсіпкер мұндай қажеттіліктің қаншалықты пайдалы екенін сезініп, заманауи талаптарға сай қызмет түрін қолға алды.
Асқар Қожаназаров ашқан орталықта бұл күндері көлік жөндеу, қозғалтқыш майларын ауыстыру, сондай-ақ автокөліктің барлық электр және электрондық жүйелерін диагностикалау мен жөндеу қызметтері сапалы көрсетілуде. Аталған қызмет жергілікті тұрғындарға аудан орталығынан ұзап шықпай-ақ өз көліктерін жөндетуге үлкен қолайлылық туғызып отыр.
Әзірге 1 адамды тұрақты жұмыспен қамтып отырған кәсіпкер алдағы уақытта ісін кеңейтіп, жұмыс орындарының санын арттыруды жоспарлап отыр. Жақында кәсіпкер атқарылып жатқан жұмыстар мен алдағы жоспарлары туралы аудан басшысына арнайы түсіндіріп өтіп, орталықтың қызметімен таныстырды.
Қорытындылай айтқанда, «Ауыл аманаты» бағдарламасы қаржылай көмекпен бірге ауыл тұрғындарының әлеуетін ашып, өзін-өзі жұмыспен қамтуға, кәсіпкерлік мәдениетін қалыптастыруға жол ашқан бірегей мүмкіндік.
Асқар Қожаназаров сияқты өз ісіне жауапкершілікпен қараған азаматтардың табысы өңірдегі шағын және орта бизнестің дамуына серпін беріп, ауылдың әлеуметтік-экономикалық әлеуетін нығайта түсетіні анық.
Айнұр ҚАЗМАҒАМБЕТОВА
