Бір шаңырақ, бір сап, бір мақсат

2021 жылдың 5 мамыры — Айбек пен Аяулымның өміріндегі ең маңызды күндердің бірі. Дәл осы күні олар шаңырақ көтеріп, ортақ өмір жолына қадам басты. Содан бері отбасы мен қызметті қатар алып келе жатқан жас жұп үшін өзара сенім мен түсіністік басты құндылыққа айналды.

Жұмахан Айбек Қыдырбекұлы 1998 жылдың 14 қыркүйегінде Жамбыл облысында дүниеге келген. Ал жары Байсеит Аяулым Қамышбекқызы 2001 жылдың 18 қазанында Жамбыл облысында өмірге келген. Туған жері ортақ екі жастың бүгінде тағдыры да бір арнада тоғысып отыр.

Капитан Айбек үшін офицерлік шен — жай ғана әскери атақ емес, үлкен жауапкершіліктің белгісі. Бұл шеннің артында күнделікті тәртіп, кәсіби біліктілік, Отан алдындағы адалдық және қабылданған әр шешімге жауап бере білу қасиеті жатыр.

Әскери қызметтің өзіндік тәртібі мен талабы бар. Қызмет бабымен жаңа жерге қоныс аудару, жаңа ортаға бейімделу, жауапты тапсырмаларды орындау — әскери өмірдің ажырамас бөлігі. Мұндай жағдайда отбасы мүшелерінің бір-біріне деген түсіністігі мен қолдауы ерекше маңызға ие.

Айбек пен Аяулымның отбасы үшін де әскери қызмет өмір салтына айналған. Олардың екі перзенті де ата-анасының қызмет жолының өзіндік куәсіндей.

Қыздары Қыдырбек Қарлығаш Айбекқызы 2022 жылдың 9 наурызында қызмет бабымен Талдықорған қаласында дүниеге келген. Ал ұлдары Қыдырбек Амир 2023 жылдың 15 мамырында Қызылорда қаласында өмір есігін ашқан.

Екі баланың екі қалада дүниеге келуі — әскери отбасының өміріндегі ерекше естелік.

— Офицер болудың қызығы мен шыжығы да сонда, балалар да әр қалада өмірге келеді, — дейді Айбек.

Бір ауыз сөздің өзінде әскери мамандықтың бар болмысы жатқандай. Әскер — тек сап түзеп, бұйрық орындау ғана емес. Ол — жауапкершілік, тәртіп, төзім және отбасыңмен бірге өмірдің түрлі сынақтарына бейімделу.

Ал Аяулым үшін жарының әскери қызметі — жақсы таныс әрі түсінікті өмір салты. Ол қызметтің жауапкершілігін, оның өзіндік тәртібін жақсы біледі. Сондықтан отбасындағы өзара қолдау мен түсіністік олар үшін басты ұстанымға айналған.

Жас отбасының басты байлығы — екі перзенті. Қарлығаш пен Амирдің балалық шағы да ата-анасының қызмет жолымен бірге өріліп келеді. Бүгінде олар үшін Талдықорған мен Қызылорда қалалары жай ғана мекен емес, отбасылық естеліктерге толы ыстық орындар.

Әскери қызметшінің артында отбасы тұрғанда оның жауапкершілігі де, жігері де арта түседі. Себебі Отан алдындағы міндетін атқарып жүрген азамат үйінде өзін күтіп отырған жақындарының амандығы үшін де еңбек етеді.

Қазақта «Ырыс алды — ынтымақ» дейді. Шаңырақтағы татулық пен өзара сыйластық бар жерде кез келген қиындықты еңсеруге болады. Айбек пен Аяулымның отбасы да осы қарапайым қағиданы өмірлік ұстаным етіп келеді.

Отбасы күні — шаңырақтың қадірін ұғындырып, отбасы құндылықтарын дәріптейтін айтулы күн. Осындай мереке қарсаңында ел тыныштығын күзетіп жүрген әскери қызметшілердің отбасына ерекше құрмет білдірген жөн. Өйткені Отан қорғаушының сенімді тірегі — оның отбасы.

Жұмахан отбасының бүгінгі тыныс-тіршілігі — әскери қызмет пен отбасылық өмірдің бір-біріне кедергі емес, қайта бірін-бірі толықтыратын құндылық екенін көрсетеді. Бірі — Отан алдындағы борышын абыроймен атқарып жүрсе, екіншісі — сол борышты өтеуге демеу болатын шаңырақтың жылуын сақтап отыр.

Бір шаңырақта екі жүрек бір мақсатқа ұмтылып, екі перзенттің қызығына кенеліп отырған отбасының бақыты да осында.

Айбек пен Аяулымға мықты денсаулық, отбасыларына береке, қызметтеріне абырой тілейміз. Қарлығаш пен Амирдің қызығын көріп, шаңырақтарының шаттығы арта берсін!

Бір саптағы қадамдары нық, бір шаңырақтағы берекелері баянды болсын!

Тәрбие және әлеуметтік-құқықтық жұмыстар жөніндегі

бөлімше бастығының аға көмекшісі