Жанашыр дәрігерлер

Мамандық адамның кәсіби қызметін, білімін және дағдыларын сипаттайтын ұғым. Әрбір мамандықтың өзіне тән ерекшеліктері, талаптары мен міндеттері болады. Мамандық таңдау жастар үшін маңызды кезең. Себебі ол болашақтағы мансаптық жолды, сүру деңгейін және жеке даму мүмкіндіктерін анықтайды.

Медициналық мамандық, әсіресе дәрігерлер, қоғам үшін ерекше маңызды болып табылады. Олар адамдардың өмірі мен денсаулығын тікелей қорғап, ауыртпалықтар мен қиындықтарды жеңуде үлкен жауапкершілік алады. Медицина саласында жұмыс істейтін ерлі-зайыптылардың өмірі мен кәсіби мансаптары қызықты әрі ерекше жағдайларды ұсынады.

Қазалы теміржол ауруханасында халыққа қалтқысыз қызмет ететін Аманкүл Ақметова мен Аманқос Бекеев медицина саласының нағыз мамандары әрі үлгілі отбасының өкілдері. Екеуі де кәсіби білімі мен тәжірибесі арқылы пациенттеріне үздіксіз медициналық көмек көрсетіп, қоғамдық денсаулықты нығайтуға үлкен үлес қосып келеді. Қос дәрігер М.Оспанов атындағы Батыс Қазақстан мемлекеттік медицина университетін тәмамдаған.

Аманқос жансақтау бөлімінде анестезиолог қызметін атқарады. Бұл оның науқастардың өміріне қауіпсіздік пен қамқорлық көрсетуді қамтамасыз ететін жауапты әрі маңызды рөлі. Ал Аманкүл емханада әйелдердің репродуктивті жүйесінің денсаулығына қатысты мәселелер бойынша жан-жақты медициналық көмек көрсететін жауапты гинеколог-кеңесші.

Жалпы анестезиология мен реаниматологияның негізгі мақсаты – науқастарға операция, диагностика жасау мен емдеу кезеңінде өмірлік қажетті ағзалардың қызметін реттеп, оны қалпына келтіру, медицина қызметкерлеріне жүрек-өкпе-ми реанимациясын, жансақтау әдістерін жүргізуге үйрету болып табылады.

– Анестезиология мен реаниматология ең қажетті үш бөлімнен тұрады. Реаниматология, үстемелеп емдеу, анестезиология. Анестезиологияның белгіленген әдістері ота салдарынан болатын ауырсынуды жою үшін, сонымен бірге емдік шараларды жүргізу үшін де қолданылады.

Бір сөзбен айтқанда, науқастың операциядан, не болмаса аса қауіпті төтенше жағдайлардан аман-есен шығып, сауығып кетуінде дәрігер анестезиолог-реаниматологтардың үлесі көп, – дейді Аманқос Сайлаубайұлы.

Аманкүл Қазиқызы Ақтөбе облысы Батыс Қазақстан Мемлекеттік медицина университетінде акушерия және гинекология мамандығы бойынша резидентура бітірген.

– Қай саланың да өзіндік қиындығы болады. Дегенмен өзің қалап таңдаған мамандығыңды ерекше ықыласпен атқарасың. Негізінде гинекология әйелдің ағзасына ғана тән аурулар мен репродуктивтік жүйесінің дерттерін зерттейтін медицинаның бір бөлігі саналады. Гинекология жүктілік пен тууға қатысты, бастапқы кезеңнен соңғы кезеңге дейінгі, әйел ағзасындағы көріністерді зерттейтін, акушерлікпен тығыз байланысты. Күні бойы қаншама әйел көрінуге келеді. Сол аралықта олардың анатомия-физиологиялық, психикалық ерекшеліктерін қадағалаймын. Кейбіріне шұғыл ем қажет болса, порталға салып ауруханаға ем алуға жолдама беремін. Тіпті кей кездері облысқа жібереміз, – дейді Аманкүл.

Бүгінде Аманкүл Қазиқызы үш баланың анасы. Құдай қосқан қосағы Аманқос екеуі бала болашағына ерекше көңіл бөліп отыр. Аманкүлдің айтуынша, Аманқос қамқор әке, жан-дүниесі игілікке толы сенімді сырлас.

Олардың кәсіби өмірлері тек кәсіби білімдерінде ғана емес, сонымен қатар отбасылық өмірде де тығыз байланысты. Аманкос операциялар барысында науқастарының қауіпсіздігін қамтамасыз етсе, Аманкүл әйелдердің денсаулығы үшін аянбай еңбек етеді.

Аманкүл Ахметова әйелдерді жасөспірімдік шақтан бастап, менопаузаға дейінгі өмір жолында, сондай-ақ жүктілік, босану және босанғаннан кейінгі кезеңдерде сүйемелдейді. Оның негізгі міндеттері өте ауқымды және кешенді көмекті қамтиды. Аманкүл Ахметованың мамандығы күрделі болғандықтан оған ерекше ықыласпен қарайды. Оның жұмысы терапияны, хирургияны, эндокринологияны және психологиялық қолдауды біріктіретін кешенді тәсілді талап етеді.

Отбасы күні кезінде Аманкүл мен Аманқос балаларымен және туыстарымен бірге демалуға уақыт бөліп, қуанышты сәттерін бөліседі. Олар отбасылық дәстүрлер мен құндылықтарды сақтай отырып, күнделікті өмірде де бір-біріне қолдау көрсетуді ұмытпайды.

Аманкүл Ахметова мен Аманқос Бекеевтің жетістіктері, олардың кәсіби тәжірибелері мен бір-біріне деген құрметі медициналық саладағы нағыз үлгі. Олар тек халықтың денсаулығына қамқорлық көрсетіп жүрген мамандар ғана емес, сонымен қатар өзгелерге отбасы құндылықтарын, мейірімділік пен адалдықты насихаттайтын үлгілі отбасы болып табылады. Мамандық таңдаудағы жауапкершілік пен жан-жақты қолдау қос жұпты ерекшелендіреді. Олардың өмірі мен қызметі көптеген жас үшін шабыт көзі.