“Екінші телефонды алыңыз“: қазақстандықтарға қауіпті қоңыраулар туралы ескертілді

Фото:depositphotos.com

Қазақстандықтарға банк және мемлекеттік орган қызметкері кейпіндегі телефон алаяқтары туралы ескерту жасалды. Олар азаматтарды екінші телефон қолдануға, бейнебайланысты қосып, мобильді құрылғы экранын көрсетуге көндіреді, деп хабарлайды Tengrinews.kz.

Қаржы нарығын реттеу және дамыту агенттігінің (ҚНРДА) мәліметінше, қаскөйлер банктік шот бойынша күмәнді операциялар, несие рәсімдеу әрекеті немесе мобильді қосымшаның бұзылғаны туралы хабарлайды. Кейін адамды ақшаны тез арада "қорғауға" және өз нұсқауларын орындауға көндіреді.

Сенімді көріну үшін олар өздерін банктің қауіпсіздік қызметі, құқық қорғау немесе мемлекеттік орган қызметкері ретінде таныстырып, адамның дербес деректерін атауы мүмкін.

Кейінгі уақытта алаяқтар екінші телефонды немесе планшетті пайдалануды, бейнебайланысты қосып, құрылғы экранын көрсетуді жиі сұрайтын болған.

Сөйлесушінің бақылауымен адамды банктің мобильді қосымшасына кіруге, биометриялық сәйкестендіруден өтуге немесе операцияларды растауға иландыруы мүмкін. Нәтижесінде ол ақшасынан айырылуға немесе несие рәсімделуіне әкеп соғатын әрекеттерді өздігінен жасауы мүмкін.

Мынадай сөздер сақтық танытуға негіз болуы тиіс:

"Сіздің шотыңыз бойынша күмәнді операция жүргізіліп жатыр",

"Сіздің шотыңызға қауіп төніп тұр",

"Сіздің атыңыздан несие рәсімдеуге әрекет жасалуда",

"Ақшаны тез арада қауіпсіз шотқа аударыңыз",

"Несиеге өтінімді тез арада қайтарып алу қажет",

"Бұл сөйлесу туралы ешкімге айтпаңыз",

"Операцияны тоқтату/растау үшін СМС-кодты айтыңыз",

"Шотты қорғау үшін қосымша орнатыңыз",

"Екінші телефонды алып, біздің нұсқауларды орындаңыз",

"Экранды көрсету функциясын қосыңыз",

"Бейнебайланыс арқылы телефон экранын көрсетіңіз",

"Бейнебайланыс арқылы жеке басыңызды растаңыз".

Банк қызметкерлері СМС және push-кодтарды, парольдерді, картаның толық нөмірін және CVV-кодты сұрамайды. Сондай-ақ олар ақшаны басқа шоттарға аударуды, екінші құрылғыны пайдалануды, экранды көрсетуді немесе телефон арқылы шұғыл қаржылық операциялар жасауды талап етпейді.

Құрылғы қорғау және мемлекеттік органдар да телефон арқылы растау кодтарын хабарлауды, биометриялық сәйкестендіруден өтуді немесе олардың нұсқауымен қаржылық операцияларды орындауды сұрамайды.

ҚНРДА бөгде адамдарға кодтар мен дербес деректерді бермеуге, күмәнді сілтемелерге өтпеуге және қоңырау шалушының өтініші бойынша қосымшаларды орнатпауға кеңес береді.

Белгісіз адамдардың нұсқауымен экранды көрсету функциясын қосуға, банктің мобильді қосымшасына рұқсат беруге немесе екінші телефонды пайдалануға болмайды.

Күмән туындаған жағдайда, қаржы ұйымының сайтында немесе банк картасында көрсетілген ресми нөмір бойынша банкке өздігінен хабарласу қажет.

Сондай-ақ несие тарихын, банк хабарламалары мен шоттардағы операцияларды жүйелі түрде тексеріп тұру, күрделі парольдер мен екі факторлы аутентификацияны, сондай-ақ "Стоп-кредит" сервисін пайдалану ұсынылады.

Егер алаяқтарға растау кодын, карта деректерін берсеңіз немесе ақша аударсаңыз, дереу банкке хабарласып, картаны және мобильді қосымшаға кіру мүмкіндігін бұғаттау қажет.

Жазысқан хаттарды, телефон нөмірлерін және операциялар туралы мәліметтерді сақтап, болған жағдай туралы құқық қорғау органдарына хабарлау керек.

ҚНРДА мынаны еске салды: егер сөйлесуші қысым көрсетсе, қорқытса, сөйлесуді құпия сақтауды талап етсе немесе шешімді тез арада қабылдауға мәжбүрлесе, сөйлесуді тоқтату қажет.