Елімізде күзде күн жылы болады
Pixabay.comҚазақстанда биыл күзде күн жылы болады. Қыркүйекте еліміздің басым бөлігінде ауа температурасы климаттық норма шамасында болса, қазан және қараша айларында көп өңірде әдеттегіден 1-2 градусқа жылы болады, деп хабарлайды Ulysmedia.kz.
Қыркүйекте температура қандай болады?
«Қазгидромет» күзге арналған консультативтік болжамын жариялады. Қыркүйекте Қазақстанның басым бөлігінде орташа температура +9...+15 градус шамасында болады. Елдің оңтүстік-батысында, сондай-ақ солтүстік-батыс пен орталықтың кей жерлерінде ауа температурасы +16...+22 градусқа дейін жетеді.
Көп өңірде температуралық фон күздің алғашқы айына тән қалыпты деңгейде болады. Батыс Қазақстан облысының басым бөлігінде, сондай-ақ Атырау және Маңғыстау облыстарының батысында ауа температурасы климаттық нормадан шамамен 1 градусқа жоғары болады деп болжанып отыр.
Солтүстікте жауын-шашын көп түседі
Қыркүйекте еліміздің басым бөлігінде жауын-шашын мөлшері климаттық норма шамасында болады.
Солтүстік Қазақстан және Павлодар облыстарында, Батыс Қазақстан мен Ақмола облыстарының басым бөлігінде, сондай-ақ Атырау, Қостанай және Қарағанды облыстарының жекелеген аумақтарында жауын-шашын мөлшері нормадан көп болуы мүмкін.
Шығыс Қазақстан облысының солтүстігі мен Абай облысында да қыркүйек жауын-шашындырақ болады.
Оңтүстікте жауын-шашынсыз
Қызылорда және Түркістан облыстарының басым бөлігінде жауын-шашын әдеттегіден аз түседі.
Сондай-ақ Маңғыстау облысының оңтүстік-шығысында, Ақтөбе облысының оңтүстігінде және Жамбыл облысының оңтүстік-батысында ауа райы құрғақ болады деп болжанып отыр.
Қазан жылы болады
Қазанда Қазақстанның басым бөлігінде орташа ауа температурасы климаттық нормадан 1-2 градусқа жоғары болады. Бұл кезеңге тән қалыпты температура негізінен Алматы, Жетісу және Шығыс Қазақстан облыстарында, сондай-ақ Түркістан, Жамбыл және Абай облыстарының жекелеген аудандарында сақталады.
Қазан айында ел бойынша жауын-шашын мөлшері жалпы алғанда климаттық норма шамасында болады.
Қарашада да күн жылырақ болады
Қарашада Қазақстанның басым бөлігінде ауа температурасы климаттық нормадан 1-2 градусқа жоғары болуы мүмкін.
Алматы, Абай, Жетісу және Шығыс Қазақстан облыстарында, сондай-ақ Жамбыл, Қарағанды және Павлодар облыстарының шығысында температура қалыпты көрсеткіштерге жақын болады.
Көп өңірде жауын-шашын мөлшері норма шамасында күтіледі. Солтүстік Қазақстан облысында және Қостанай, Ақмола, Павлодар облыстарының солтүстігінде жауын-шашын әдеттегіден көбірек түсуі мүмкін.
