Еліміздің бірқатар өңірінде 41°С-қа дейін ыстық болады
«Қазгидромет» алдағы күндері еліміздің көптеген өңірінде тұрақсыз ауа райы сақталатынын мәлімдеді.
7–8 шілде аралығында батыс, шығыс, солтүстік, орталық және оңтүстік-шығыс аймақтарда жаңбыр жауып, найзағай күтіледі, деп хабарлайды Jambylinfo.kz
7 шілдеде орталық пен шығыс өңірлерде, 8 шілдеде батыс облыстарында және оңтүстік-шығыстың таулы бөліктерінде нөсер жаңбыр болуы ықтимал. Ал 9 шілдеде батыс аймақтарда жауын-шашын күшейіп, желдің екпіні артады, кей жерлерде бұршақ түсуі мүмкін.
Синоптиктердің болжамынша, алдағы күндері ауа температурасы біртіндеп көтеріледі. Солтүстік-батыс пен орталық өңірлерде күн 35–39 градусқа дейін ысиды, кей аудандарда аптап ыстық 41 градусқа жетуі мүмкін.
Солтүстік аймақтарда да қатты ыстық сақталып, ауа температурасы 35–38 градус шамасында болады деп күтілуде.
