Таза Қазақстан: Қазалыда санитарлық, тазалық, абаттандыру жұмыстары ұйымдастырылуда
Бүгін Қазалы ауданында Мемлекет басшысының бастамасымен жүзеге асқан «Таза Қазақстан» акциясы аясында көктемгі санитарлық тазалық, абаттандыру, көркейту-көгалдандыру жұмыстары күнделікті ұйымдастырылуда.Тазалық шарасына аудандағы мекемелердің ұжым қызметкерлері белсенді түрде қатысып, Әйтеке би кентінің орталық көшелері мен шет аймақтарын, Т.Бөріқұлақов көшесі, Әйтеке би, Жанқожа батыр көшелерінің бойын, кіреберіс қақпа мен теміржол өткелі маңындағы аумақтарды тазартуда.
Экологиялық акцияны бір күндік науқан емес туған жердің тазалығына жауапкершілікпен қарау деп түсінетін қазалылықтар көше бойында және аяқ су арықтарының ішіндегі ретсіз өшкен шөптерді шауып, гүл көшеттерін егу, бағаналарды, жол белгілерін, орындықтарды, аялдамаларды сырлау жұмыстарын жүргізуде.
Мұндай шаралар ауданның экологиялық тазалығын сақтауға, туған жердің көркеюіне өз үлесін қосады. Тазалық – баршамызға ортақ міндет. Сондықтан тазалық акциясы аясындағы жұмыстар аудан көлемінде әрі қарай да жалғасатын болады.
