Синоптиктер дабыл қақты: кей өңірлерде қар аралас жаңбыр мен үсік болады
Фото: pixabay.com 12 мамырда Қазақстанның бірнеше өңірінде бір мезетте үсік, шаңды дауыл және нөсер жаңбыр күтіледі. SMARTNEWS.KZ басылымының хабарлауынша, 12 мамырға арналған синоптиктер болжамы елдің бірқатар өңірінде ауа райының күрт нашарлайтынын көрсетті.
Бір облыста шаңды дауыл соқса, енді бірінде қар аралас жаңбыр, бұршақ пен үсік күтіледі. Кей өңірлерде желдің екпіні секундына 30 метрге дейін жетуі мүмкін. «Қазгидромет» мәліметінше, Жетісу облысындағы Алакөл маңында солтүстік-батыстан соғатын желдің екпіні 30 м/с және одан да жоғары болуы ықтимал. Сонымен қатар өңірдің таулы аумақтарында тұман түсіп, өрт қаупі сақталады. Алматы облысында түнде және күндіз қатты жаңбыр жауып, таулы аудандарда жаңбыр мен қар аралас жауын-шашын күтіледі. Найзағай ойнап, бұршақ жаууы мүмкін. Іле Алатауында сел жүру қаупі де сақталып отыр. Алматы мен Қонаевта да нөсер мен жел болжанған. Қызылорда, Маңғыстау және Атырау облыстарында шаңды дауыл күтіледі. Желдің жылдамдығы 15-20 м/с-қа дейін күшейеді. Атырау мен Ақтауда да қолайсыз ауа райы сақталады. Солтүстік, орталық және шығыс өңірлерде үсік жүреді. Абай, Шығыс Қазақстан, Ақмола, Қарағанды, Павлодар, Қостанай, Солтүстік Қазақстан және Ұлытау облыстарында түнгі температура 0 градустан төмендеп, кей жерлерде 1-6 градус үсік болады. Кей өңірлерде жаңбыр мен қар аралас жауын-шашын күтіледі. Жамбыл және Түркістан облыстарының таулы аудандарында қатты жаңбыр, найзағай, бұршақ пен дауыл болжанып отыр. Өзендерде су деңгейінің көтерілу қаупі сақталған. Батыс Қазақстан мен Ақтөбе облыстарында да жел күшейіп, түнгі уақытта үсік жүруі ықтимал. Синоптиктер алдағы күндері Алматы, Жетісу және Шығыс Қазақстан облыстарындағы өзендерде су деңгейі көтерілуі мүмкін екенін ескертті. Кей елді мекендер мен жолдарды су басу қаупі бар. Мамандар тұрғындарға ауа райы туралы ескертулерді ескеріп, ұзақ жолға шықпауға, таулы және өзен маңындағы аумақтарда сақ болуға кеңес берді.
