ТӘРТІП ДРОН АРҚЫЛЫ БАҚЫЛАНУДА

Бүгінде аудан орталығы мен барлық елді мекендерде күл-қоқысты тазарту, қоршаған ортаны абаттандыру шаралары жүйелі түрде жүзеге асырылып келеді.

Өкінішке қарай «жұлатын емес, егетін, ластайтын емес, тазалайтын» қоғам қалыптастыру жолында әлі де кедергілер бар. Кейбір тұрғынның немқұрайлылығы салдарынан тазартылған аумақтардың қайта ластануы, тұрмыстық қалдықтар мен кәріз суларының белгіленбеген орындарға, тіпті бейіттер маңына төгілуі жиілеп кетті.

Осы мәселені түбегейлі шешу үшін аудан көлемінде заманауи технологиялардың көмегіне жүгіну туралы шешім қабылданды. Ол үшін әуеден бақылау қолға алынып, құқық бұзушыларды анықтау мақсатында арнайы дрондар қолданысқа енгізілді.

Рейдтік шаралар күшейтіліп, тиісті мекемелер мен жұмысшы топтары тұрақты бақылау жүргізіп, заң бұзушылықтарды дереу тіркеуде.

Әкімшілік жауапкершілікке басымдық берілуде. Тәртіпке бағынбаған азаматтарға заң аясында айыппұлдар салынып, қатаң шаралар көрілуде.

Қазіргі таңда Әйтеке би кентінің аумағында абаттандыру мен көгалдандыру жұмыстары қарқынды жүріп жатыр. Кенттің сәулеттік келбетін жақсарту мақсатында бірқатар шаруа қолға алынды.

Атап айтқанда, инфрақұрылымға орай жаяу жүргіншілер жолдары (тротуарлар) жөнделіп, қалпына келтірілуде. Эстетикалық тұрғыда да біршама жұмыс іске асырылды. Қоғамдық орындардағы орындықтар сырланып, демалыс аймақтары жаңартылуда. Мәдени мұра бойынша кенттің тарихи нысандары мен әрбір бұрышы ерекше назарға алынып, көгалдандыру шаралары жүйелі атқарылуда.

Қоғамдық орындарды жарықтандыру да тасада қалмады. Көшелер мен саябақтардың жарық шамдарын ретке келтіру арқылы қауіпсіздік пен қоршаған орта тартымдылығы қатар сақталуда.

«Тазалық – тазаланған жерде емес, сақталған жерде» деген бар. , «Құрметті аудан тұрғындары мен қонақтары. Туған жердің көркейіп, шырайлы болуы – әрқайсымыздың қолымызда. Қоршаған ортаға бейжай қарамай, белгіленген талаптарды сақтау – азаматтық парызымыз. Тазалықты өз босағамыздан бастайық», – дейді мамандар.