Заңсыз лоторея ойнатып жүрген блогерлер келтірген шығынына байланысты тексеріледі
Фото: shutterstockҚазақстанда лоторея ойнату үшін арнайы лицензия керек. Ал оңды-солды заңсыз лоторея ойнатып жатқан блогерлердің әрекеті келтірген шығынына қарай тексерілетін болады. Бұл туралы Бас прокурордың орынбасары Ерлан Өтегенов Сенат кулуарында айтты.
«Лоторея ойнату – лицензиялатын қызмет түрі екені белгілі. Арнайы лицензиясыз лоторея ойнатып жатқан блогерлердің іс-әрекеті келтірген шығынына байланысты сарапталады. Ал Жанабыловтарға келетін болсақ, қазір сот жүріп жатқаны белгілі. Сот шешімі шыққан соң ғана пікір білдіре аламыз», – деді ол.
Жанабыловтар ісі
2025 жылдың 18-21 тамызы аралығында Instagram-да @Zhanabylov_e және @elt6i аккаунты арқылы танымал блогерлер 10 автокөлік ойнататынын жариялады.Алайда тікелей эфирдің орнына қолданушыларға Zhana Business атты ақылы оқу курсының сілтемесі ұсынылған. Курс құны – 30 мың теңге. Ұтысқа қатысу үшін осы курсты сатып алу қажет болған. Бұл жағдай әлеуметтік желіде сынға ұшырап, мемлекеттік органдарға шағым түсті.
Жанабыловтарға қатысты әкімшілік іс 2025 жылдың 5 қыркүйегінде басталды. Содан кейін сот заңсыз лотерея өткізу фактісі бойынша қозғалған әкімшілік істі тоқтату туралы қаулы шығарды. Бұл істе қылмыстық құқықбұзушылық белгілері бар болғандықтан, іс экономикалық тергеу департаментіне жолданатын болды.
