ҚАЗАЛЫ АУДАНЫ: МЕРЕКЕГЕ АЙНАЛҒАН РЕФЕРЕНДУМ
Бүгін Қазақстан Республикасының Конституциясына арналған республикалық референдум Қазалы ауданында жоғары деңгейде ұйымдастырылып, ел бірлігі мен ынтымағын айшықтаған мерекелік шараларға ұласуда.
Аудан бойынша барлық дауыс беру учаскелерінде арнайы этноауылдар құрылып, келушілерге ерекше мерекелік көңіл-күй сыйлануда. Учаскелер аумағында концерттік бағдарламалар ұйымдастырылып, аудан өнерпаздары әсем ән шырқап, ұлттық мәдениетімізді насихаттауда.
Референдумға келуші тұрғындарға қазақтың ұлттық тағамдары – бауырсақ, айран, шұбат, қымыз ұсынылып, қонақжайлық дәстүріміз кеңінен дәріптелуде. Сонымен қатар, ұлттық салт-дәстүрлерден сахналық көріністер қойылып, қолөнер және мәдени көрмелер ұйымдастырылып, келген жұртшылыққа халқымыздың бай мұрасы таныстырылуда.
Осылайша, ел болашағы үшін маңызды саяси науқан Қазалы ауданында халықтың белсенді қатысуымен, ұлттық құндылықтармен астасқан нағыз халықтық мерекеге айналуда. Тұрғындар өз таңдауларын жасап қана қоймай, бірлік пен берекенің үлгісін көрсетіп, ел тағдырына бейжай қарамайтынын дәлелдеуде.
