«+23,6 градусқа дейін көтерілген»: 19 ақпан Алматыда күн жылып, температура рекордын жаңартты
Алматы және Алматы облысында 19 ақпан күн жылынды.
Синоптиктер 19 ақпан Алматыдағы 1859 жылдан бергі ең жылы күн болып тіркелгенін мәлімдеді, деп хабарлайды KYN.KZ ақпарат агенттігі.
19 ақпанда ауа температурасы +23,6 градусқа дейін көтерілген. Бұған дейінгі абсолют рекорд +19 градус 1979 жылғы 17 ақпанда тіркелген еді.
Алматы және Алматы облысы бойынша "Қазгидромет" филиалының метеорологиялық болжамдар бөлімінің басшысы Дәулет Кесебаевтың айтуынша, қазіргі синоптикалық жағдай "жылудың кең ауқымда таралуы" деп аталады. Бұл - оңтүстік-батыс және оңтүстік бағыттағы желдер арқылы Орта Азия мен Қазақстанның оңтүстігіне жылы ауа келіп, кейін оның тропосфераның барлық қабатына кеңінен таралу үдерісі.
Еске салсақ, Алматыда 16 ақпаннан бастап күн жылына бастады. Ол күні ең жоғары температура +14,5 градусқа жетті.
