Өзбекстанда кітапты көп оқығандарға ақшалай сыйақы берілмек

Өзбекстан президенті «Халық арасында оқу мәдениетін дамыту және кітап оқуға қызығушылықты арттыру жөніндегі шаралар туралы» қаулыға қол қойды.
Құжатқа сәйкес, 2026 жылғы 1 наурызға дейін барлық мемлекеттік мекемелер мен ведомстволарда оқу мәдениетінің ішкі рейтинг жүйесі енгізілуі тиіс, деп жазады Vaib.uz.
Ең көп кітап оқыған қызметкерлер конкурс негізінде  анықталады. Жеңімпаздарға айлық жалақысы мөлшерінде ақшалай сыйақы беріледі.
Оқушылар мен студенттер үшін де ынталандыру шаралары қарастырылған. Ең көп кітап оқығандар жүздігіне кірген әр оқушы мен студент 10,3 млн сум көлемінде ақшалай сыйақы алады.
Сондай-ақ 2026 жылғы 1 сәуірге дейін барлық мемлекеттік құрылымдар мен ведомстволарда «Кітап бұрыштары» ашылып, қызметкерлер үшін ай сайын «Кітап оқу сағатын» өткізуге міндеттелді.