Жаңа даму бағыттары белгіленді

Жалпы трансшекаралық хабтарды дамыту халықаралық сауданы жеңілдетуге, қойма-логистикалық жүйелерді күшейтуге және өңірлік экономикалық ынтымақтастықты арттыруға мүмкіндік береді. Соның бірі «Батыс Қытай – Батыс Еуропа» халықаралық транзиттік автодәлізінің 129 шақырымы Қазалы ауданының аумағынан өтеді. Дәліз Қазалы ауданының транзиттік маңыздылығын арттыруымен қоса, агро және индустриялық өнімдерді экспортқа шығарумен шағын және орта бизнеске жаңа нарықтар ашуда. Осы ретте біз автодәліздің мүмкіндіктерін пайдалану арқылы ауданымыздың экономикасын әртараптандырып, жаңа индустриялық өсім нүктесін қалыптастыру қажет. Сондықтан аудан көлемінде өтетін автодәліздің инвестициялық тартымдылығын арттыру жөніндегі жұмысты күшейту керектігін айтқан аудан басшысы бұл бағытта жұмыстарды жандандырып, тиісті іс-шаралар жоспарын әзірлеуді тиісті сала мамандарына тапсырды.

Күн тәртібіндегі келесі мәселе Қазақстан Республикасында қалдықтардың барлық түрлерін басқарудың 2026-2030 жылдарға арналған тұжырымдамасы жайында болды.

– Бұл тұжырымдама ел үшін экологиялық және экономикалық тұрғыдан өте маңызды қадам. Қалдықтарды «қалдық» күйінде қалдырудың орнына, оларды қайта өңдеу және пайдалану арқылы 2030 жылға дейін қалдықтардың қайта өңделу үлесін 40 пайызға жеткізу жоспары қарастырылған. Қалдықтарды қайта өңдеудің артуы экологиялық жүктемені азайтуға көмектеседі. Сондықтан осы бағыттағы жұмыстарды қолға алып, басталған жобаларды аяқтау қажетпіз. Сұрыптау кешенін салу аудан үшін әлеуметтік маңызы бар жоба. Аталмыш жобаға байланысты ескертпелер мен кемшіліктер тез арада жойылуы қажет, – деді А.Есмаханов.

Аудан әкімінің мәлімдеуінше, халық көп шоғырланатын орындарда экобокстар мен фандоматты орнату бойынша Әйтеке би кенті әкімінің аппаратына бірқатар тапсырма берілді.

Кәсіпкерлік саласын дамыту ел экономикасының өсуі мен халықтың әл-ауқатын арттыруда маңызды рөл атқаратын бағыт. Ол жаңа жұмыс орындарының ашылуына, инновациялардың енгізілуіне және ішкі нарықтың нығаюына ықпал етеді. Мемлекет тарапынан кәсіпкерлікті қолдау үшін бағытталған гранттар мен жеңілдетілген несиелер берілуде. Мемлекеттің қолдауын мақсатты және мерзімінде пайдаланған жөн.

Жиын барысында кәсіпкерлік саласы бойынша атқарылған жұмыстарды аудандық кәсіпкерлік және өнеркәсіп бөлімінің басшысы Ғалымжан Зинадинов баяндады. Аудан әкімі Алмасбек Есмаханов «ОперативноҚазалы» whatsapp чаты арқылы Әйтеке би кентінде орналасқан кәсіпкерлік нысандардың: кафе, бар, дүкен, базар және маркеттердің сыртқы келбетіне сырлау, әктеу және жарнамалық билбордтарын жаңалау бойынша күнделікті тапсырма беріліп отырғандығын еске салды. Алайда аталған жұмыстар да өз деңгейінде орындалмай келетіндігін және Әйтеке би кентінде орналасқан кәсіпкерлік нысандар шаһар келбетіне сай болуын тілге тиек етті.

Алқалы басқосуда салық түсімдері, көлеңкелі бизнес, азаматтарды мерзімді әскери қызметке шақыру мен тазалық жұмыстары және баспасөз басылымдарына жазылу мәселелері де қозғалды.