Бірлескен әрекетке басымдық берілді
Ауданда қоғамдық қауіпсіздікті нығайтуға бағытталған жаңа бастама қолға алынып, жергілікті билік органдары, құқық қорғау құрылымдары және білім беру саласының өкілдері бір алаңға жиналды. Аудан әкімі Алмасбек Есмахановтың тапсырмасына сәйкес іске асқан бұл басқосу «Заң мен тәртіп» идеологиясын жүйелі түрде жүзеге асыруға арналған маңызды қадамдардың бірі болды. Қоғамдағы тұрақтылық пен қауіпсіздік тек мемлекеттік мекемелердің емес, барша азаматтың ортақ міндеті екенін ескере отырып, жауапты ұйымдар мен сала мамандары өзара пікір алмасып, нақты іс-шараларды айқындады.Осы мақсатта ұйымдастырылған арнайы мәжіліске Қазалы аудандық прокуратурасының қызметкерлері, аудандық полиция бөлімінің жергілікті полиция қызметі мен ювеналды полиция инспекторлары, білім беру ұйымдарының басшылары мен олардың орынбасарлары, ауылдық округтердің заңгер мамандары және жастар өкілдері қатысты. Жиынға аудан әкімінің орынбасары Дәурен Тлеумбетов төрағалық етіп, қоғамдық тәртіп пен қауіпсіздікті қамтамасыз етудегі мемлекеттік құрылымдардың үйлесімді жұмыс жүргізуі аса маңызды екенін атап өтті.
Ол өз сөзінде қоғамдық қауіпсіздік мәселесі бүгінгі күні стратегиялық деңгейдегі міндетке айналғанын, ал прокуратура органдарының үйлестіруші қызметі бұл бағытта шешуші рөл атқаратынын атап өтті. Дәурен Оңғарбайұлы құқық қорғау органдарының жұмысы заңдылыққа, кәсібилікке, жедел әрекет етуге және алдын алу шараларының сапасына негізделуі тиіс екенін жеткізді. Сондай-ақ ол құқық бұзушылық фактілерін болдырмау үшін барлық ресурстарды тиімді біріктіру қажеттігін тілге тиек етті.
Жиын барысында аудан прокурорының міндетін атқарушы Биқожа Жұмаш «Заң мен тәртіп» қағидаттарының мән-маңызына тоқталса, аудандық полиция бөлімінің бастығы Асылбай Аңсатов жастар мен кәмелетке толмағандар арасындағы құқық бұзушылықтың алдын алу бағытында атқарылып жатқан жұмыстарды таныстырды. Ал аудандық білім бөлімінің басшысы Әділхан Жөлекешов оқу орындарындағы тәртіп пен профилактикалық жұмыстар және алдағы жоспарлар жөнінде баяндама жасады.
Қорытынды сөз алған Дәурен Тлеумбетов «Заң мен тәртіп» идеологиясын жүзеге асыру бағытындағы жұмыстар жүйелі түрде жалғаса беретінін айтып, жиынға қатысушыларды қоғамдық тәртіпті сақтау және құқық бұзушылықтың алдын алу ісінде бірлесе жұмыс істеуге шақырды.
А. ЖҮСІПОВА
